14 dekabr kuni Xalqaro Press-klubning navbatdagi sessiyasida Davlat statistika qo‘mitasi, Iqtisodiyot vazirligi vakillari ishtirokida “O‘zbekiston Respublikasining ijtimoiy-iqtisodiy rivojlanishi: tendensiyalar, muammolar va istiqbollar” mavzusi muhokama qilindi. Unda qatnashgan Iqtisodiyot vaziri o‘rinbosari Mubin Mirzayev statistika ma'lumotlarini e'lon qilish va ularni tahlil qilish borasidagi ayrim muammolarga ham to‘xtaldi.
“Biz iqtisodchilar oldida har doim nima uchun bizda yaxshi iqtisodchi talabalar, yaxshi iqtisodchi mutaxassislar yetishib chiqmayapti, degan savol turadi. Aytish kerakki, respublikada eng zo‘r iqtisodchilar bor va ular butun dunyo bo‘ylab turli xorijiy davlatlarda ishlayapti. Faqat muammo nimada? Muammo shundaki, o‘sha iqtisodchilarimiz statistik ma'lumotlar yo‘qligi, o‘zlariga kerakli axborotlarni olish imkoniyati yo‘qligi uchun tahlil qila olmaydi va yetuk ekspert sifatidagi fikrini ayta olmaydi. Mana shu narsa bizning eng katta muammomizdir.
Agar biz statistik ma'lumotlarni bevosita OAVda e'lon qilsak, veb-saytga joylashtirishni yo‘lga qo‘ysak, dunyoning turli burchaklaridagi iqtisodchilarimiz ma'lumotlarni tahlil qilib, o‘z fikrlarini bera olishadi. Iqtisodiyot vazirligi ham statistik ma'lumotlardan foydalanuvchi sifatida ushbu ma'lumotlarni o‘z vaqtida va sifatli ola bilsa, iqtisodiyotni rivojlantirish uchun barcha tahliliy ishlarni amalga oshirish imkoniga ega bo‘ladi.
Vazirlar Mahkamasining qarori qabul qilinib, Davlat statistika qo‘mitasi boshchiligida ishchi guruh tuzildi. Uning vazifasi statistik ma'lumotlar bilan bog‘liq barcha normativ hujjatlarni qayta ko‘rib chiqib, takomillashtirib, ularni investorlarga, ilmiy ishlar bilan shug‘ullanuvchilarga yetkazish masalalari bilan shug‘ullanishdir.
Shu o‘rinda bizning oldimizda turgan yana bir muammolardan biri, YaIMni hisoblashda pul-kredit statistikasi bo‘lishi kerak. Uni ochiq-oydin e'lon qila olmayapmiz. To‘lov balansi, eksport-import amaliyotlarini bajarishda ularning hajmi qanday, bularga doir ma'lumotlarni ham oshkora e'lon qila olmayapmiz.
Davlat tashqi qarziga doir ma'lumotlar, qarz miqdori oshayaptimi, tushayaptimi, davlat byudjyeti daromadi va xarajatlariga tegishli ma'lumotlarni e'lon qilishda qiynalayapmiz. Mana shu yuqorida qayd etganlarim ma'lumotlar bo‘lmasa, YaIM miqdorini aniq ayta olmaymiz”, - dedi Mubin Mirzayev.
