Isroil prezidenti Falastin yetakchisini Ramazon oyi kirib kelgani bilan tabrikladi  

Isroil prezidenti Reuven Rivlin Falastin yetakchisi Mahmud Abbosni Ramazon oyi kirib kelgani va sog‘ayib ketgani bilan tabrikladi. Rivlin Abbosga G‘azo sektoridagi norozilik namoyishlarida falastinliklar halok bo‘layotgan bir vaqtda qo‘ng‘iroq qilgan.  

O‘z navbatida Abbos ham Rivlinga qo‘ng‘iroq uchun minnatdorlik bildirgan.

G‘azo sektoridagi namoyishlar 30 mart kunidan beri davom etib kelmoqda va sektordan blokada olinmaguncha davom ettirilishiga va'da qilinmoqda. Namoyishlar AQSh Isroildagi elchixonasini Al-Qudsga ko‘chirishi qaroridan keyin yangi kuch bilan avj olgan. Falastinlik shifokorlarning ma'lum qilishicha, namoyishlar boshidan 119 falastinlik halok bo‘lgan, 13,2 mingi o‘q va gazdan jarohat olgan, ulardan 300 nafari og‘ir ahvolda.

May oxirida 83 yoshli Abbos kasalligi tufayli davolangan shifoxonadan chiqqan. Uning navbatdagi marta shifoxonaga yotqazilishi Falastin ichidagi ziddiyat sharoitida ishonchli vorisi va hokimiyatni topshirish mexanizmi yo‘qligi haqidagi yangi munozaralarga sabab bo‘lgan.