Balandligi bo‘yicha Janubiy Koreyada birinchi va dunyoda beshinchi o‘rinda turuvchi Lotte World Tower binosi yangi unvonni qo‘lga kiritdi. U dunyodagi eng tezyurar liftga ega bino sifatida e'tirof etildi. Business Insider nashrining xabar berishicha, lift binoning birinchi qavatidan 121-qavatiga bir daqiqa ichida yetib boradi.
Qayd etilishicha, bino mutlaqo xavfsiz — u 9 balli zilzilaga va AQSh janubi-sharqini vayron qilgan "Katrina" kabi dovulga ham dosh beradi. Bino 123 qavatdan iborat.
U Seuldagi eng ommabop turistik maskanlardan hisoblanadi. Yangi unvonni qo‘lga kiritganidan so‘ng mazkur binoga tashrif buyuruvchilar soni yiliga 60 mln kishiga yetishi kutilmoqda.
