Netanyaxu Isroil Eronning Suriyadagi kuchlariga hujum qilganini tan oldi

Isroil bosh vaziri Binyamin Netanyaxu mamlakat harbiylari 11 fevralda Suriyaga zarba berganini va hujumdan maqsad Eron kuchlari bo‘lganini tasdiqladi.

Suriyaning SANA davlat agentligi ma'lumotlariga ko‘ra, dushanba kechki vaqt Isroil tanklari Suriyaning chegara yaqinidagi hududlariga bir nechta snaryad otgan va Kunaytra viloyatidagi shifoxona va kuzatuv punktiga hujum qilgan. 

“Biz har kuni harakat qilamiz, hamma vaqt Eronga qarshi, jumladan kecha ham. Eronga va uning mintaqada mustahkamlanib olishiga qarshi”, deb aytgan Netanyaxu Polshaga safaridan oldin.

Isroil bosh vaziri Polshada AQSh tomonidan Yaqin Sharq bo‘yicha tashkillashtirilayotgan anjumanda ishtirok etmoqchi. Anjumanda ko‘tariladigan asosiy masala Eron tomonidan solinayotgan xavf – uning yadroviy ambitsiyalari, mintaqaviy ekspansiyasi va Suriyada o‘rnashib olishga urinishlari bo‘ladi.