Toshkentdan Sankt-Peterburgga uchib kelgan yo‘lovchi samolyotining “Pulkovo” aeroportida uchish-qo‘nish yo‘lagidan tashqariga chiqib ketishiga yomon ob-havo sharoiti va yo‘lakning holati sabab bo‘lgan bo‘lishi mumkin. Bu haqda “O‘zbekiston havo yo‘llari” matbuot xizmati ma'lum qildi.
Samolyot mahalliy vaqt bilan soat 21:59da qo‘ngan, biroq samolyotni boshqarish vaqtida yo‘lakdan chiqib ketgan. Samolyot bortida 241 nafar yo‘lovchi, 15 nafar ekipaj a'zosi bo‘lgan. Hodisa oqibatida hech kim jabrlanmagan.
“RF tergov qo‘mitasi va Rosaviatsiya “Pulkovo” aeroportidagi hodisa yuzasidan tergov olib bormoqda”, deyiladi aviakompaniya xabarida.
Hodisa sabab HY632/02MAR19 reysining uchirilishi vaqti ko‘chirildi. Aviakompaniyaning Sankt-Peterburgdagi vakolatxonasi ushbu reys yo‘lovchilarini mehmonxonada joylashtirish chorasini ko‘rdi. Mazkur reysga oid ma'lumotlarni aviakompaniyaning Sankt-Peterburgdagi vakolatxonasidan +7-911-780-00-11 raqamiga hamda «Toshkent» aeroportining +99878-140-28-01, +99878-140-28-02, +99878-140-28-03, +99878-140-28-04 raqamlariga qo‘ng‘iroq qilib olish mumkinligi aytilmoqda.
Rossiya tergov qo‘mitasi va Rosaviatsiya «Pulkovo» aeroportidagi holat yuzasidan tekshiruv olib bormoqda.
