Ijtimoiy tarmoqlarda Olmazor tumani hokimi o‘rinbosari bilan bog‘liq muhokamalar sovimay turib, Farg‘onada yangi mavzuni «tayyor» qilishdi.
«Internetni portlatgan» audioda gapirayotgan odam respublikaning yetakchi bir viloyati rahbari ekaniga bemalol ishonish mumkin. Chunki bu ovozda avval ham ko‘p marta shunday alfozdagi shunday so‘zlarni eshitganmiz...
Toshloqliklarni haqorat qilgan ham shu hokim, Toshkentdan borgan amaldorlarning ichak-chavoqlarini boshlariga salla qilib qo‘yish bilan tahdid qilgan ham shu hokim, Rishtonda minglab odamlarni hasharga majburlagan ham shu hokim.
Hokim ayollarning tashqi qiyofasini o‘zgartirish bilan mashg‘ul bo‘lishi, kiyimi o‘ziga yoqmagan bemorni shifoxonadan haydab solishi, viloyatga kelgan mehmonlarning soqolini qirtishlashi, kitob sotuvchilarni qamash bilan tahdid qilishi, kim deputat bo‘lishini belgilashi - bu qandaydir komedik janrdagi film ssenariysi emas, ayni kunda hayotimizda ro‘y berayotgan hodisalar.
Bu ishlardan keyin bu rahbar xodim qayerda o‘qigan, qayerda tayyorlangan, Konstitutsiya va qonunlardan xabardormi, boshqaruv nimaligi haqida tushunchaga egami, tashqarida yigirma birinchi asr, texnologiyalar zamoni ekanini biladimi kabi to‘xtovsiz savollar tug‘ilaveradi.
Yoki Farg‘ona hokimi mutlaq hokimiyatga egaman deb o‘ylaydimi? Albatta unga hech kim mutlaq vakolat berib qo‘ygani yo‘q. Unda u nega vakolatlari chegarasidan chiqmoqda? Nega O‘zbekistonni butun dunyoga sharmanda qilmoqda?
Ahvol bu darajaga yetib kelishining sababi uning atrofidagilar tomonidan «haybarakallachilik» qilib kelingani, qanday nohaqliklar bo‘lsada ko‘z yumib kelingani, indamay bo‘yin egib kelinganida emasmi? Ahvol bu darajaga yetib kelganining sababi shu vaqtga qadar ko‘rsatgan hunarlari uchun jazolanmay qolgani emasmi?
