Hukumat Sanitariya-epidemiologiya xizmatining nazorat faoliyati bo‘yicha qaror qabul qiladi

Vazirlar Mahkamasining “Sanitariya-epidemiologiya xizmatining nazorat faoliyatini takomillashtirish to‘g‘risida”gi qarori loyihasi e'lon qilindi.

Quyidagilar:

• Tadbirkorlik sub'yektlari faoliyatining sanitariya qoidalari, normalari va gigiyena normativlariga mosligi bo‘yicha “Sanitariya-epidemiologiya osoyishtalik belgisi”ni berish to‘g‘risidagi Nizom;
• Yuridik va jismoniy shaxslar tomonidan sanitariya qoidalari, normalari va gigiyena normativlariga rioya etilishini nazorat qilishni amalga oshirish bo‘yicha ma'muriy reglament;
• Oziq-ovqat xomashyosi va iste'mol mahsulotlarini ishlab chiqarish, tashish, saqlash va sotish faoliyatiga bog‘liq xavf-xatarni barvaqt aniqlash bo‘yicha jamoatchilik nazoratini joriy qilish to‘g‘risidagi Nizom tasdiqlanadi.

Sanitariya-epidemiologik osoyishtalik va jamoat salomatligi xizmati hamda Axborot texnologiyalari va kommunikatsiyalarini rivojlantirish vazirligi:

a) 2021 yil 1 aprelga qadar:

YaIDXPda ushbu qaror bilan tasdiqlangan Sanitariya-epidemiologiya osoyishtalik belgisini berishning har bir bosqichida tadbirkorlik sub'yektlari murojaatlarining ko‘rib chiqilishini kuzatib borish tartibini joriy etishni;

davlat xizmatlarini ko‘rsatish uchun zarur bo‘lgan to‘lovlar, davlat xizmatlari ko‘rsatilganligi uchun to‘langan to‘lovlar va yig‘imlar Yagona billing tizimi orqali amalga oshirish;

b) 2021 yil 1 mayga qadar:

• oziq-ovqat xomashyosi va iste'mol mahsulotlarini ishlab chiqarish, tashish, saqlash va sotish faoliyatiga bog‘liq xavf-xatarni barvaqt aniqlash bo‘yicha jamoatchilik nazorati natijasi bo‘yicha videoyozuvlar orqali qayd etilgan sanitariya qoidalari, normalari va gigiyenik normativlari talablari buzilganligi bo‘yicha huquqbuzarlik holatlari to‘g‘risidagi videoyozuvlarni to‘plovchi markazlashtirilgan tizim ishga tushirishni;
• markazlashtirilgan tizimga kelib tushayotgan videoyozuvlar bo‘yicha tizimli monitoring yuritish va protsessual harakatlarni amalga oshirish uchun ushbu tizimni Sanitariya-epidemiologik osoyishtalik va jamoat salomatligi xizmatining “Ma'muriy amaliyot” kompleks avtomatlashtirilgan axborot tizimiga integratsiya qilishni ta'minlaydi.

Chora-tadbirlarni amalga oshirish bilan bog‘liq xarajatlar Sanitariya-epidemiologik osoyishtalik va jamoat salomatligi xizmatining budjetdan tashqari mablag‘lari, xalqaro moliya institutlari, xorijiy tashkilotlar hamda donor mamlakatlar kreditlari va grantlari, shuningdek, qonun hujjatlarida taqiqlanmagan boshqa manbalar hisobidan amalga oshiriladi.