Andijon HETK: «Obod qishloq» dasturi bo‘yicha 76ta mahallada elektr ta'minoti yaxshilandi  

“Andijon HETK” AJ matbuot xizmati xabariga ko‘ra, Andijon viloyati shahar va tumanlaridagi 76ta mahalla fuqarolar yig‘inida elektr energiyasi ta'minotini yaxshilash, xizmat ko‘rsatish sifatini oshirish bo‘yicha olib borilgan o‘rganishlar natijasida sharoiti o‘ta og‘ir deb topilgan, tuman sektorlari rahbarlarining e'tiboridan chetda qolib ketgan 16ta hudud tanlab olindi.

Jumladan, Asaka tumanidagi “Ulug‘bek”, Bo‘ston tumanidagi “Sarbon”, Jalaquduq tumanidagi “Osuda hayot”, Izboskan tumanidagi “Kuyganyor”, Marhamat tumanidagi “To‘lg‘a”, Qo‘rg‘ontepa tumanidagi “Dardoqtepa”, Oltinko‘l tumanidagi “Xo‘ja”, Ulug‘nor tumanidagi “Terakzor”, Xo‘jaobod tumanidagi “Orday”, Shahrixon tumanidagi “To‘lqin”, Andijon tumanidagi “Mustaqillik”, Baliqchi tumanidagi “Siza”, Buloqboshi tumanidagi “Sharq yulduzi”, Paxtaobod tumanidagi “Ziyoli”, Xonobod shahridagi “Yuksalish” va Andijon shahridagi “Sadda” mahallalarida amaliy ishlarga kirishildi.

Rejaga muvofiq, mazkur hududlarda 24,7 km uzunlikdagi past kuchlanishli elektr tarmoqlari tortilib, 15ta yangi transformator punkti o‘rnatiladi. 38,4 km tarmoqdagi 21ta transformator punkti mukammal ta'mirdan chiqariladi.

“Andijon hududiy elektr tarmoqlari korxonasi” aksiyadorlik jamiyati bosh direktori A.Jo‘rayevning ma'lum qilishicha, joriy yilgi davlat dasturi asosida viloyat bo‘yicha 1 146 km elektr tarmoqlari tortilib, 306ta yangi transformator punkti o‘rnatilishi ko‘zda tutilgan.

Shuningdek Xo‘jaobod tumani “Orday” MFY og‘ir hudud deb topilganligi uchun “Hududiy elektr tarmoqlari” boshqaruvi raisi o‘rinbosari D.Nosirov boshchiligida “Andijon HETK” AJ vakillari bilan birgalikda ushbu mahalla fuqarolar yig‘inidagi aholi xonadonlarida elektr ta'minotidagi kamchiliklar bartaraf etilmoqda.

Ayni vaqtda “Orday” MFY Pasyolka ko‘chasida TP№ 360/50 kVA transformator punkti to‘la ta'mirlandi, TP№360/50 kVA.dan chiquvchi 1,2 km 0.4 kV tarmoq daraxt shoxlaridan tozalandi, simlar taranglashtirildi, tayanchlarning estetik holati yaxshilandi. Aholi xonadonlarida elektr ta'minotini yaxshilash maqsadida 16 dona temir-beton tayanchlar olib kelinib, hozirda o‘rnatish ishlari olib borilmoqda.

Ma'lumot uchun, davlat rahbarining 2016 yil 23 noyabrdagi “2017-2021 yillarda past kuchlanishli elektr tarmoqlarini yanada modernizatsiya qilish va yangilash dasturi to‘g‘risida”gi qaroriga ko‘ra, so‘nggi to‘rt yil davomida Andijon hududi bo‘ylab 2 256 km elektr tarmoqlari tortilib, 985ta transformator punkti o‘rnatildi.

2021 yilgi davlat dasturi asosida joriy yilda 1 146 km past kuchlanishli elektr tarmoqlari va 306 dona transformator punktini rekonstruksiya va modernizatsiya qilish rejalashtirilgan bo‘lib, shundan elektr ta'minoti og‘ir bo‘lgan 76ta mahalla hududida iste'molchilarga qulayliklar yaratish maqsadida 24,7 km masofada elektr uzatish tarmoqlari, 15 dona transformator punkti yangidan qurilishi birinchi galdagi vazifa sifatida belgilab olindi.