Shavkat Mirziyoyev va Vladimir Putin telefon orqali muloqot o‘tkazdi

Shavkat Mirziyoyev va Vladimir Putinning telefon orqali muloqoti chog‘ida Rossiya-O‘zbekiston hamkorligini yanada rivojlantirish masalalari muhokama qilingan.

Shuningdek, sentabr oyida Samarqand shahrida bo‘lib o‘tadigan Shanhay hamkorlik tashkilotining sammitiga tayyorgarlik ko‘rish masalalari ham ko‘rib chiqilgani aytiladi.

Avvalroq O‘zbekiston tashqi ishlar vaziri vazifasini bajaruvchi Vladimir Norov sentabr oyida Samarqandda bo‘lib o‘tadigan ShHT sammiti chog‘ida imzolanishi rejalashtirilgan hujjatlar haqidagi ma’lumotlarni o‘rtoqlashgandi.

“Sammitning asosiy siyosiy hujjati - Samarqand deklaratsiyasi loyihasida mamlakatlarimizning eng muhim mintaqaviy va global masalalar bo‘yicha konsolidatsiyalashgan pozitsiyalari aks ettirilgan”, dedi Vladimir Norov.
 
Hujjatda amaliy hamkorlikni yanada takomillashtirish, mintaqaviy barqarorlik, xavfsizlik va barqaror iqtisodiy rivojlanishni ta’minlash, transport aloqasini mustahkamlash, madaniy muloqotni chuqurlashtirish bo‘yicha qo‘shma yondashuvlar bayon etilgan.

ShHTga a’zo davlatlar davlat rahbarlari kengashi yig‘ilishi asosiy qismi uzoq muddatli yaxshi qo‘shnichilik, do‘stlik va hamkorlik to‘g‘risidagi shartnomani amalga oshirish keng qamrovli rejasi, transport sohasidagi o‘zaro bog‘liqlik konsepsiyasi, sanoat kooperatsiyasi dasturi, “ShHT yaxshi niyat elchisi” faxriy unvoni to‘g‘risida”gi nizom va boshqa muhim hujjatlarni boyitishga qaratilgan.