«Saxovat» va «Muruvvat» uylarida to‘liq videokuzatuv joriy etiladi

“Saxovat” va “Muruvvat” internat uylari hamda Urush va mehnat faxriylari uchun respublika pansionati (tibbiy-ijtimoiy muassasalar) Bojxona qo‘mitasiga biriktirildi. Bojxona qo‘mitasi keksalar va nogironlarni protez-ortopediya moslamalari hamda reabilitatsiya qilish texnik va gigiyenik vositalari bilan ta’minlashga ko‘maklashadi.

2023–2024 yillarda “Saxovat” va “Muruvvat” internat uylarida videokuzatuv moslamalari o‘rnatiladi. 2022 yil 1 oktyabrdan “Saxovat” va “Muruvvat” internat uylaridagi tarbiyachilar har yili kamida bir marotaba malaka oshirish kurslarida o‘qitiladi.

2023 yil 1 iyungacha ruhiy va jismoniy rivojlanishida kamchiligi bo‘lgan shaxslar zamonaviy abilitatsiya va reabilitatsiya muolajalaridan o‘tishi uchun “Saxovat” va “Muruvvat” internat uylari negizida zarur texnologik sharoitlar yaratiladi. Har yili 1 iyun “Xalqaro bolalarni himoya qilish kuni”ga bag‘ishlab “Muruvvat” bolalar uylari tarbiyalanuvchilari o‘rtasida respublika miqyosida sport musobaqalari uyushtiriladi.

2022 yilda Namangan viloyati “Saxovat” internat uyi hududida nuroniylar bo‘sh vaqtini samarali tashkil qilish maqsadida kunduzi pulli xizmat ko‘rsatuvchi “Keksalar bog‘i” tashkil qilinadi.