BMT shafeligi ostida o‘tgan konferensiyada O‘zbekistonning chegara xavfsizligini ta’minlash tajribasi taqdim etildi

U “Terrorizmga qarshi kurash va terrorchilar transchegaraviy harakati oldini olish maqsadida chegara xavfsizligi bo‘yicha xalqaro va mintaqaviy hamkorlik” mavzusida bo‘lib o‘tgan yuqori darajadagi xalqaro konferensiyada moderator sifatida ishtirok etdi.

Chegara xavfsizligini ta’minlash masalalarida qonun ustuvorligi va jamiyatning barcha qatlamlari ishtirokini ta’minlashga qaratilgan sessiyada xalqaro va mintaqaviy tashkilotlar rahbarlari, huquq-tartibot idoralari va diplomatik korpus vakillari qatnashdi.

O‘zbekistonning bu boradagi tajribasiga to‘xtalar ekan, SMTI direktori O‘zbekiston prezidenti Shavkat Mirziyoyev tomonidan bu borada olib borayotgan siyosat asosiy tamoyili – terrorizmga qarshi kurash fundamental asosi inson huquq va erkinliklarini, qonun ustuvorligini ta’minlash ekanligini qayd etdi. Terrorizmga qarshi kurash va inson huquqlarini himoya qilish bir-biriga zid bo‘lmagan, balki bir-birini to‘ldiradigan va mustahkamlaydigan maqsadlar ekanligi alohida ta’kidlandi.

E.Aripov, ayniqsa, Markaziy Osiyo mintaqasida jamiyatda o‘zaro muloqotni, ta’lim-tarbiyani rivojlantirish, xotin-qizlar va yoshlarning imkoniyatlarini kengaytirish kabi muammolarni hal qilmasdan turib, terrorizmga qarshi samarali kurash haqida gapirish mumkin emas, dedi. Bu masalalar o‘zaro bog‘liqligi ayonlashayotgani qayd etildi.

SMTI direktori bugungi kunda Markaziy Osiyoda aksilterror siyosati keng qamrovli va inklyuziv yondashuvga asoslanishi zarurligi haqida tushuncha shakllanganiga ham to‘xtaldi. Joriy yil mart oyida Toshkent shahrida qabul qilingan BMT Markaziy Osiyoda Global aksilterror strategiyasini amalga oshirish bo‘yicha Qo‘shma harakatlar rejasiga muvofiq, terrorizmga qarshi kurashda mintaqa barcha mamlakatlari nafaqat davlat organlari, balki fuqarolik jamiyati institutlarini ham jalb etish dolzarbligi qayd etildi.

Shuningdek konferensiya doirasida, BMT bosh kotibi o‘rinbosari – BMT Terrorizmga qarshi kurash boshqarmasi rahbari Vladimir Voronkov bilan ham uchrashuv bo‘lib o‘tdi. 

Uchrashuv davomida SMTI va BMT Terrorizmga qarshi kurash boshqarmasi o‘rtasidagi hamkorlik holati va rivojlanish istiqbollari muhokama qilindi. Tomonlar O‘zbekiston va BMT Terrorizmga qarshi kurash boshqarmasi o‘rtasidagi hamkorlikni rivojlantirish bo‘yicha “Yo‘l xaritasi”, O‘zbekiston prezidentining joriy yil 3-4-mart kunlari BMT Markaziy Osiyoda Global aksilterror strategiyasini amalga oshirish bo‘yicha Toshkent konferensiyasida ilgari surilgan tashabbuslarini hayotga tatbiq etishda hamkorlik qilishga kelishib oldilar.

Uchrashuvda o‘zaro manfaatli sohalarda hamkorlikni mustahkamlash bo‘yicha anglashuv memorandumini imzolashga kelishildi.