«O‘zbekiston «mojarolar faqat halokatli oqibatlarga olib keladi», degan fikrda qat’iy» – tashqi ishlar vaziri

18 dekabr kuni Tashqi ishlar vazirligi tomonidan Toshkent viloyatining Bo‘stonliq tumanida «Yangi O‘zbekiston: o‘zgaruvchan va o‘zaro mushtarak dunyoda ishonchli hamkor» mavzusida davra suhbati tashkil etildi. Vladimir Norov uchrashuvda «Markaziy Osiyo+» formatidagi muloqotni rivojlantirish masalalariga e’tibor qaratgan.

«Markaziy Osiyo+» formati mintaqaviy muvozanatni mustahkamlash va saqlashga xizmat qilgan holda turli kelishmovchiliklarga aralashmasdan, vazmin va mustaqil siyosat olib borishga sodiqligimizdan dalolat beradi», deya Norovning so‘zlarini keltirmoqda TIV matbuot xizmati.

Shuningdek, O‘zbekiston tashqi siyosat idorasi rahbari bugungi kunda pragmatik va konstruktiv diplomatiya g‘oyat muhimligi haqida gapirgan.

«O‘zbekiston mojarolar va qarama-qarshiliklar faqat halokatli oqibatlarga va g‘oliblar bo‘lmaydigan vaziyatlarga olib keladi, degan fikrga qat’iy amal qiladi. Oqilona murosaga asoslangan diplomatiyagina barcha tomonlarning manfaatlariga teng va ziddiyatsiz javob beradi», – dedi Vladimir Norov chet ellik diplomatlar bilan uchrashuvda.