Livanda dastlab peyjyerlar, keyingi kuni — ratsiyalar yoppasiga portlashi oqibatida kamida 30 kishi halok bo‘ldi, yana uch mingdan ortiq kishi turli og‘irlikda tan jarohatlari olgan. Jabrlanganlar orasida aloqa uchun peyjyerlardan foydalanuvchi «Hizbulloh» harakati a’zolari ham ko‘p. Isroil bu amaliyot uchun rasman javobgarlikni o‘z zimmasiga olmagan, ammo Isroil razvedkasi vakillari bu hujum ortida o‘zlari turganini tan olishgan. Isroil mudofaa vazirligi va razvedkasining sobiq hamda hozirda ishlayotgan 12 nafar xodimi The New York Times bilan muloqotda amaliyotga qanday tayyorgarlik ko‘rilgani haqida aytib berishgan. Gazeta suhbatdoshlari uni «murakkab va uzoq davom etgan» amaliyot deb ta’riflagan, nashrning o‘zi esa bunga «zamonaviy Troya oti» deya nom bergan.
Wael Hamzeh / EPA / Scanpix / LETA
«Hizbulloh» a’zolari bir necha yil oldin aloqa vositasi sifatida mobil telefonlar o‘rniga peyjyerlardan foydalanishni boshlagandi — The New York Times nashri yozishicha, buni harakat yetakchisi Hasan Nasrulloh talab qilgan. U «Hizbulloh» yig‘ilishlarida telefondan foydalanishni taqiqlagan va reja tafsilotlari hech qachon mobil telefonlar orqali uzatilmasligi uchun harakat a’zolariga doim yonida o‘z peyjyerlari bilan yurishni buyurgan. 2024 yil fevralida Nasrulloh alohida bayonot berib, yana bir bor telefonlardan qutulishga — ularni «ko‘mib tashlash» yoki «temir qutiga solib qo‘yish»ga chaqirgan. Isroil esa, NYT yozganidek, bunda «bir imkoniyat ko‘rgan».
NYT manbalariga ko‘ra, «Hizbulloh» amalda to‘liq peyjyerlardan foydalanishga o‘tishidan oldinroq, Isroil razvedkasi Vengriyada o‘zini peyjyerlar ishlab chiqaruvchi sifatida ko‘rsatuvchi BAC Consulting kompaniyasini, shuningdek, uning faoliyatini yashirish maqsadida yana ikkita soxta firma ochgan. BAC Consulting kompaniyasining oddiy mijozlari ham bo‘lgan, ular uchun oddiy peyjyerlar ishlab chiqarilgan. Ammo «ahamiyatga ega bo‘lgan» yagona mijoz «Hizbulloh» edi.
Isroil razvedkasining uch vakilining so‘zlariga ko‘ra, «Hizbulloh» uchun peyjyerlar alohida tayyorlangan va tarkibiga PETN portlovchi moddasi (PeNTA, pentaeritrittetranitrat) qo‘shilgan batareyalarga ega bo‘lgan. BAC Consulting kompaniyasi 2022 yilda Livanga bu peyjyerlarni kichik miqdorda yetkazib berishni boshlagan, ammo Nasrullohning mobil telefonlar xavfi to‘g‘risidagi bayonotlaridan keyin yetkazib berish hajmi oshgan.
