Soxta diplomdan boshlangan karera firibgarlik va tovlamachilik bilan davom etdi va buni o‘tgan operatsiya oshkor qildi. Turkiya prezidenti Erdo‘g‘an asosiy raqibi Imomo‘g‘lining hibsga olinishiga shunday munosabat bildirib, namoyishlarni “ko‘cha terrori” deb atadi. Imomo‘g‘lining hibsga olinishi to‘liq Erdo‘g‘an bilan bog‘liq emas, lekin siyosiy sabablar, albatta, bor. Xalqaro siyosat konteksti o‘zgararkan, prezident yana saylanish harakatida, deydi Kun.uz bilan suhbatlashgan siyosiy tahlilchi Javit Turko‘g‘li.
Akrom Imomo‘g‘li hibsga olinarkan, u firibgarlik, tovlamachilik, davlat tenderlarini korrupsiya orqali tanish-bilishlarga sotish hamda terrorizmga homiylikda ayblandi. Merning qo‘lga olinishi Imomo‘g‘lining universitet diplomi bekor qilinishidan bir necha kun o‘tib, muxolif partiyaning prezidentlikka nomzodi deb e’lon qilinishidan esa bir necha kun avval sodir bo‘ldi. Tabiiyki, ham muxolifat, ham jamoatchilik bunda Erdo‘g‘an va uning jamoasini aybladi.
Turkiya adliya vazirligi Imomo‘g‘lining hibsga olinishini prezidentga bog‘laganlarni “haddini bilmaganlar” deb atab, hukumatning bu ishda qo‘li yo‘qligini uqtirmoqda.
Turkiyalik tahlilchi, Eron va Markaziy Osiyoni yaqindan o‘rgangan siyosatshunos Javit Turko‘g‘lining Kun.uzʼga aytishicha, Istanbul meri aslida ham ko‘p mojarolarga o‘ralashib qolgandi. Ammo bu masalasining siyosiylashuvi omilini rad etmaydi. Ya’ni uning qamoqqa tashlanishi Erdo‘g‘an manfaatlariga mos keladi, biroq Imomo‘g‘lining hozirgi statusi bunga bemalol sharoit yaratgan. Hukumat esa olovga moy sepdi, chunki u asosiy siyosiy raqib edi, deydi Turko‘g‘li.
“Shubham bor, ya’ni hammasi Erdo‘g‘anning va hukumatning rejasi deyolmayman. Akrom Imomo‘g‘li Istanbul meri bo‘lishidan avval Beylikduzu shahri hokimi edi va o‘shanda ham unga nisbatan qator sud ishlari ochilgan. Ammo hozirgi ish siyosiylashtirildi” – Javit Turko‘g‘li, siyosiy tahlilchi
Ma’lum bo‘lishicha, Akrom Imomo‘g‘lining Istanbul universitetidan olgan diplomi soxta ekanini uning partiyasidagilar ham tasdiqlagan.
“Bu ishga hukumat aralashmadi, partiyaga yaqin bir jurnalist buni fosh qildi. Imomo‘g‘li Kiprdagi bir oddiy va taniqli bo‘lmagan universitetdan Istanbul universitetiga noqonuniy o‘qishini ko‘chirgan. Nafaqat u, o‘sha yilda o‘qishini noqonuniy ko‘chirgan barchaning diplomi bekor qilindi” – Javit Turko‘g‘li, siyosiy tahlilchi
Yakshanba, 23 mart kuni Respublika xalq partiyasi hibsda bo‘lsa-da, navbatdagi saylov uchun Akrom Imomo‘g‘lini nomzod qilib ko‘rsatdi. Partiya praymerizlarida 15 milliondan oshiq turk fuqarolari qatnashgan, ulardan 13.2 millioni Imomo‘g‘li nomzodini qo‘llab-quvvatlagan. Biroq siyosatshunos Imomo‘g‘li nomzod bo‘lolmasligini gapirdi.
