AQShda isroilliklarni otib o‘ldirgan shaxsga ayblov qo‘yildi

31 yoshli Elias R. birinchi darajali qotillik va boshqa bir qancha og‘ir jinoyatlarda ayblanmoqda. Vashingtondagi federal prokuratura rahbari vazifasini bajaruvchining aytishicha, uni o‘lim jazosi kutmoqda.

Foto: IsraelinUSA/Twitter/Anadolu/picture alliance

22 may, payshanba kuni Vashingtondagi federal sudda bir kun avval AQSh poytaxti markazida Isroil elchixonasining ikki xodimini otib tashlaganlikda gumonlanayotgan Chikagoda yashovchi 30 yoshli Elias R.ga qarshi ayblovlar qo‘yildi. Ayblovlar ro‘yxatiga ikkita birinchi darajali qotillik, xorijiy amaldorlarni o‘ldirish, o‘qotar qurol bilan o‘ldirish va zo‘ravonlik jinoyatida o‘qotar quroldan foydalanish kiradi.

Vashingtondagi federal prokuratura rahbari vazifasini bajaruvchi Janin Pirro bu ish terrorchilik harakati va nafrat jinoyati sifatida tekshirilishini aytdi. Uning qo‘shimcha qilishicha, ayblanuvchi o‘lim jazosiga mahkum etilishi mumkin. AQSh bosh prokurori Pam Bondi gumonlanuvchi yolg‘iz harakat qilgani bo‘yicha dastlabki versiyani aytdi.

Elias R. 22 may kuni birinchi sud majlisida deyarli hech narsa demadi, faqat sudyaning o‘z huquqlarini tushunadimi yoki yo‘qmi degan savoliga «ha» deb javob berdi. Ayblanuvchi hibs bo‘yicha eshituvlar huquqidan voz kechdi. Uning ishi bo‘yicha dastlabki sud majlisi 18 iyunga belgilangan.