Husiychilar rahbari Isroil zarbasi oqibatida halok bo‘ldi

2024 yil avgustidan beri husiychilar hukumatini boshqarib kelgan Ahmad G‘olib Ar-Rahoviy Isroil Yaman poytaxtiga zarba berganida hukumatning navbatdagi yig‘ilishini o‘tkazayotgan bo‘lgan.

28 avgust kuni isroillik harbiylar «Yamanning Sano shahri hududida husiychilar terrorchilik rejimidagi harbiy nishon»ga zarba berilganini ma’lum qilgandi.

Reuters agentligi o‘shanda halok bo‘lganlar orasida mudofaa vaziri va husiychilar shtabi boshlig‘i ham borligini ma’lum qilgandi. Xabarda Isroil yuqori martabali amaldorlar oldindan yozib olingan nutqni televizorda tomosha qilish uchun to‘plangan bir nechta joyga zarba berganini xabar qilgan.

Ar-Rahoviy «Ansor Alloh» harakati Tel-Avivdagi Ben Gurion aeroportiga «Falastin-2» gipertovushli raketasi yordamida hujum qilingani haqida xabar berganidan bir kun o‘tib o‘ldirildi.

Isroilning Keshet 12 telekanalida juma kuni berilgan xabarga ko‘ra, mamlakat harbiylari husiychilarning butun hukumati (12 vazir va bosh vazir) zarba oqibatida halok bo‘lgan deb hisoblaydi, biroq bu yakuniy baho emas. Keshet 12 o‘z ma’lumotlari manbasini ko‘rsatmagan.

Yamanning Al-Jumhuriya nashri al-Rahoviy Sanodagi kvartirasida vafot etgani haqida xabar bergan.

Bungacha Isroil 25 avgust, dushanba kuni Yaman poytaxtiga zarbalar bergandi. Mahalliy rasmiylar ma’lumotlariga ko‘ra, ushbu hujum oqibatida kamida 10 kishi halok bo‘lgan, 100 kishi jarohatlangan.

Husiychilar Hamas bilan urushda Isroil tomon bir necha bor raketa va dronlar uchirgan hamda buni falastinliklarga birdamlik ifodasi deb izohlagan. Isroil havo hujumidan mudofaa tizimlari aksar hollarda ularni muvaffaqiyatli tutib oladi.

Bundan tashqari, husiychilar Qizil dengiz va Adan ko‘rfazidagi savdo kemalarini muntazam ravishda o‘qqa tutgan.

Ushbu hujumlarga javoban Isroil va AQSh Yamanning isyonchilar nazoratidagi hududlariga, jumladan, mamlakat poytaxtiga ko‘plab zarbalar berib keladi.

May oyida AQSh prezidenti Donald Tramp ma’muriyati husiychilar bilan kelishuv haqida e’lon qilib, kemalarga hujumlar to‘xtatilishiga javoban havo hujumlarini to‘xtatishga va’da bergandi. Isyonchilar kelishuv Isroilga aloqador nishonlarga hujumlarni to‘xtatishni anglatmasligini ta’kidlagandi.

Isyonchi husiychilarning «Ansor Alloh» harakati 2014 yilda Yamanda siyosiy kuchga ega bo‘lgandi. 2015 yildan beri ular mamlakat poytaxti Sanoni nazorat qilmoqda.