HAMAS yana ikki garovga olingan shaxsning jasadini Isroilga qaytardi

HAMAS guruhi Isroilga garovga olingan yana ikki kishining jasadini topshirdi. Isroil mudofaa kuchlari (TSAHAL) 21 oktyabr, seshanba kuni kechqurun: «Isroil harbiy kuchlari hamrohligida halok bo‘lgan garovga olinganlarning jasadlari bo‘lgan ikkita tobut yaqinda Isroil chegarasini kesib o‘tdi», deb xabar berdi.

Keyinroq bosh vazir Binyamin Netanyahuning idorasi jasadlar 85 yoshli Are Zalmanovich va yana bir garovga olingan shaxs ekani aniqlanganini, ularning oilasi hali uning ismini chop etishga ruxsat bermaganini ma’lum qildi. Zalmanovich 2023 yil 7 oktyabrda HAMAS harakati hujumi paytida uyidan o‘g‘irlab ketilgan va 2023 yil 17 noyabrda asirlikda vafot etgan, deb yozadi The Times of Israel sud-tibbiy ekspertiza natijalariga tayanib.

HAMASda 13 nafar garovga olingan shaxsning jasadi qolmoqda. 10 oktyabr kuni o‘t ochishni to‘xtatish kelishuvi kuchga kirganidan beri jami 15 ta jasad qaytarildi. Jangchilar garovga olinganlarning qoldiqlari G‘azo sektoridagi binolar va tunnellar vayronalari ostida ko‘milgani va ularni qayta olib o‘tish uchun «maxsus texnika» zarurligini bildirmoqda.

Isroil armiyasi G‘azo sektoridagi harbiy amaliyotlarini to‘xtatgan o‘t ochishni to‘xtatish kelishuviga ko‘ra, HAMAS 13 oktyabrgacha tirik qolgan 20 nafar garovga olinganni va uch kun ichida barcha halok bo‘lgan 28 nafar garovga olinganning jasadini qaytarishi kerak edi. Faqat birinchi talab to‘liq qondirildi.