Donor ko‘z shox pardasi bioprotezlarini qo‘llash tartibi tasdiqlanadi

Sog‘liqni saqlash vazirligi xorijiy davlatlardan keltiriladigan “donor ko‘z shox pardasi” bioprotezlarini tibbiyot tashkilotlarida qo‘llash tartibini ishlab chiqdi.

Asosiy jihatlar:

• maqsad: keratoplastika amaliyotlari sonini oshirish va bemor xavfsizligini ta’minlash;
• tashish va saqlash: maxsus sovitilgan, termoizolyatsiyali konteynerlarda, steril sharoitda, nomlari bo‘yicha alohida saqlash shart;
• yetkazib berish vaqti: bioprotezlar 8 soat ichida amaliyot o‘tkaziladigan klinikaga yetkazilishi lozim;
• mas’ul shaxs: har bir tibbiyot muassasasida tashish/saqlash uchun alohida tibbiyot xodimi mas’ul qilib tayinlanadi;
• qarshi ko‘rsatmalar: transplantat rad etish xavfi yuqori immun holat, kompensatsiyalanmagan umumiy kasalliklar (masalan, qandli diabet), ruhiy kasalliklar, shox pardaning kuchli vaskulyarizatsiyasi, kompensatsiyalanmagan glaukoma, ko‘zning o‘tkir yallig‘lanishlari mavjud bo‘lsa, keratoplastika o‘tkazilmaydi.

Bemor o‘z xohishi bilan murojaat qiladi, shu kuni doktor tomonidan suhbat va yozma ogohlantirish o‘tkaziladi. Suhbat bemorni ogohlantirgan holda majburiy videoyozuvga olinadi. Keratoskopiya, paximetriya, zaruratda biopsiya kabi to‘liq oftalmologik tekshiruvlar amalga oshiriladi.

Amaliyotdan keyingi davr: klinikada 1–5 kun kuzatuv (bemor holatiga qarab shifokor xulosasi bilan 14 kungacha o‘zgartirilishi mumkin). Bemor hududiy tibbiyot muassasasiga dispanser nazoratga o‘tkaziladi. 1 yil davomida har 1,5–2 oyda, keyin har 3–4 oyda oftalmolog ko‘rigidan o‘tib boradi.