Vadeful: Putin muzokaralarni boshlamaslik uchun bahona qidirmoqda

Germaniya tashqi ishlar vaziri Yoxann Vadefulning fikricha, Rossiya prezidenti Vladimir Putin Ukraina bilan tinchlik muzokaralarini boshlamaslik uchun doimiy ravishda turli bahonalar topmoqda. Vadeful bu haqda 2 dekabr kuni Berlinda Misr tashqi ishlar vaziri Badr Abdel Ati bilan uchrashuv chog‘ida aytgani haqida dpa agentligi xabar berdi.

«Vladimir Putin doim nega u muzokaralar olib borishni istamasligini izohlash uchun yangidan yangi bahonalar topadi <...>. Shu sababli men uning umuman tinchlik muzokaralariga jiddiy yondashishiga hali ham shubha bilan qarayman», — deya Germaniya TIV rahbarining so‘zlarini keltirdi jurnalistlar.

Shu bilan birga, Vadefulning aytishicha, u va AQSh davlat kotibi Marko Rubio dushanba kuni bo‘lib o‘tgan telefon suhbati davomida urushni ishonchli tarzda to‘xtatish Ukraina va butun Yevropada doimiy tinchlik va xavfsizlikka olib kelishi kerakligini muhokama qilgan. Shuningdek, ular «otishmani to‘xtatish vaqti kelgani» borasida hamfikr ekanini qayd etgan.

Germaniya tashqi ishlar vaziri AQSh prezidenti Donald Tramp ma’muriyatiga urushni to‘xtatishga qaratilgan sa’y-harakatlari uchun minnatdorlik bildirdi va bu harakatlarning bir qismi sifatida Trampning maxsus vakili Stiven Uitkoffning Moskvaga tashrifi amalga oshishini qo‘shimcha qildi.

Amerika delegatsiyasi 2 dekabr kuni Rossiya va Ukraina o‘rtasida tinchlik kelishuvi yuzasidan Vladimir Putin bilan muzokaralar o‘tkazish uchun Moskvaga bordi. Rossiya prezidenti matbuot kotibi Dmitriy Peskov AQSh tomonidan muzokaralarda faqat Uitkoff va Donald Trampning kuyovi Jared Kushner ishtirok etishini ma’lum qilgan.

Moskvadagi uchrashuv paytida Uitkoff Putinga Donald Trampning yangilangan tinchlik rejasi loyihasini taqdim etishi kutilgandi.