Isroilda Eron zarbalaridan kamida sakkiz kishi jabrlandi

Eronning raketa zarbalari natijasida Isroilda, mahalliy hokimiyat ma’lumotlariga ko‘ra, kamida sakkiz kishi jabrlangan. Isroilning “Magen David Adom” (MDA) qutqaruv tashkiloti yakshanba, 15 mart kuni ma’lum qilishicha, Tel-Avivning turli hududlarida to‘rt kishi snaryad bo‘laklaridan jarohat olgan.

Ularning ma’lumotiga ko‘ra, taxminan 60 yoshlardagi erkak o‘rtacha og‘ir ahvolda shifoxonaga yotqizilgan, u siniq oyna parchalaridan bosh qismida jarohat olgan. Yana uch nafar jabrlanuvchiga portlash zarba to‘lqini ta’siri tufayli joyida tibbiy yordam ko‘rsatilgan.

Isroil politsiyasi kuzatuv kamerasi yozuvini e’lon qildi. Unda, iddao qilinishicha, Tel-Aviv atrofida kassetali o‘q-dorining yerga tushish lahzasi aks etgan. Kadrlarda snaryad ko‘chada bo‘lgan odamlar yonida portlaganini ko‘rish mumkin.

Tush paytiga yaqin Isroil qutqaruvchilari 44 va 62 yoshli ikki erkak ham jabrlanganini xabar qildi, ular yengil jarohat olgan. Tunda esa snaryad bo‘laklari tushishi natijasida taxminan 80 yoshlardagi ikki fuqaroga tibbiy yordam kerak bo‘lgan.

Isroil tashqi ishlar vaziri Gideon Saar Eronni fuqarolarga ataylab zarba berishda aybladi. 

“Biz harbiy obektlarga hujum qilayotgan bir paytda, Eron rejimi tinch aholiga zarba bermoqda”, — dedi u Isroil shimolidagi Zarzir badaviy qishlog‘iga tashrifi chog‘ida. U yerda ikki kun avval Eronning raketa hujumi natijasida qariyb 60 nafar aholi jabrlangan edi.

Tashqi ishlar vaziri urush boshlanganidan beri Isroildagi barcha qurbonlar tinch aholi vakillari bo‘lganini ta’kidladi.

“Albatta, bu harbiy jinoyatdir”, — deya Saarning so‘zlarini AFP agentligi keltirgan.

Isroil sog‘liqni saqlash vazirligi ma’lumotlariga ko‘ra, 28 fevraldan beri jami 3195 nafar isroillik shifoxonaga yotqizilgan, 15 mart ertalab holatiga ko‘ra, ulardan 81 nafari hali ham shifoxonada qolmoqda.