Qoʻshimcha funksionallar
-
Tungi ko‘rinish
OAV Xominaiyning o‘g‘li qanday qilib o‘limdan qutulib qolgani haqida xabar berdi
Zarbadan sal oldin Mujtaba uydan tashqariga chiqqan. Eronlik rasmiylardan birining aytishicha, portlash vaqtida u «oyog‘idan yengil jarohat olgan». Amerika tomoni esa buni shubha ostiga olmoqda.
Foto: AP
Eronning yangi diniy rahbari Mujtaba Xominaiy AQSh va Isroilning 28 fevral kungi zarbasidan biroz oldin uydan tashqariga chiqqani tufayli omon qolgan. Bu haqda Ali Xominaiyning devoni protokol xizmati rahbari Mazoher Husayniy tomonidan Islom inqilobi muhofizlari korpusi (IIMK) qo‘mondonlariga yo‘lllagan murojaat audioyozuviga asoslanib The Telegraph xabar tarqatdi.
Mujtaba Xominaiy ham rafiqasi va o‘g‘li bilan birga otasi joylashgan o‘sha kompleksda edi. 28 fevral kuni kompleks bo‘ylab zarba berildi.
«Allohning irodasi bilan Mujtaba hovliga chiqishiga to‘g‘ri kelgandi. Ular binoga qarata raketa uchirishganda, u tashqarida edi va yuqoriga qarab ketayotgandi», – deyiladi yozuvda.
Husayniyning so‘zlariga ko‘ra, Mujtaba «oyog‘idan yengil jarohatlangan». Uning tasdiqlashicha, zarbalar kompleksdagi bir necha binolarga bir vaqtning o‘zida berilgan va Xominaiylar oilasini to‘liq yo‘q qilishga qaratilgan. Zarba oqibatida Mujtabaning rafiqasi va o‘g‘li, shuningdek otasi Ali Xominaiy halok bo‘ldi.
Eronlik rasmiylardan biri The Telegraph uchun izohida harbiy qo‘mondonlarda yangi oliy rahbarning holati haqida aniq ma’lumot yo‘qligini aytgan.
- Eronda 8 mart kuni Mujtaba Xominaiy mamlakatning yangi rahbari etib saylangani e’lon qilindi. Ammo u 28 fevraldan buyon jamoatchilikka ko‘rinish bermadi. Eron TIV u urushning dastlabki kunida jarohatlanganini tasdiqlagan, ammo uning holati yaxshi ekani ma’lum qilingan.
- Erondagi davlat nashrlari 2 mart kuni 28 fevral kungi zarba oqibatida Ali Xominaiyning rafiqsi Mansura Xo‘jasta ham halok bo‘lganini xabar qilgandi. Ammo bir necha kun o‘tib Fars agentligi u tirik qolganini ma’lum qildi.
- Kuvaytdagi «Al-Jarida» gazetasi 15 mart kuni Mujtaba Xominaiy ayni vaqtda Moskvada davolanayotgani haqida xabar berdi. RF prezidenti matbuot kotibi Dmitriy Peskov bu ma’lumot yuzasidan izoh berishni istamadi.
- AQSh Mujtaba Xominaiyning manzili haqida ma’lumot bergan shaxsga 10 million dollargacha mukofot va’da qilgan.
AQSh va Isroilning Eronga tajovuzi
