Sun’iy intellekt yangi konlarni topish jarayonini ikki barobar tezlashtiradi

Prezident Shavkat Mirziyoyev tog‘-kon sanoati va geologiya tarmog‘ida raqamli hamda sun’iy intellekt texnologiyalarini joriy etish bo‘yicha taqdimot bilan tanishdi.

Taqdimotda qayd etilishicha, 2025 yilda tog‘-kon sanoati korxonalari mamlakatda ishlab chiqarilgan jami sanoat mahsulotining 20 foizini ta’minlagan. Soha korxonalarining budjetga tushumlari esa 118,5 trillion so‘mni tashkil etgan.

Ta’kidlanganidek, sun’iy intellekt texnologiyalari geologik ma’lumotlarni tezkor tahlil qilish, qazilma boyliklarni prognozlash, zaxiralarni aniq hisoblash va burg‘ilash ishlari samaradorligini oshirish imkonini beradi. Shu maqsadda geologiya-qidiruv ishlarining barcha bosqichlariga AI yechimlarini joriy qilish rejalashtirilgan.

Bugungi kunda sohada xaritalar, qidiruv natijalari, burg‘ilash ma’lumotlari, laboratoriya tahlillari va ishlab chiqarish ko‘rsatkichlari kabi katta hajmdagi ma’lumotlar to‘planmoqda. Ularni yagona elektron bazaga jamlash va 3D modellar orqali tahlil qilish yangi konlarni aniqlash imkoniyatlarini kengaytiradi.

Hisob-kitoblarga ko‘ra, raqamli texnologiyalardan samarali foydalanish natijasida mahsulot tannarxini 10 foizga kamaytirish, yangi konlarni ochish muddatini ikki barobar qisqartirish hamda investorlarga taqdim etiladigan takliflar sonini to‘rt baravar oshirish mumkin.

Taqdimotda 2030 yilgacha geologiya va tog‘-kon sanoatiga 30 milliard dollardan ortiq investitsiya jalb qilish maqsadi belgilangani ham ta’kidlandi. Buning uchun Geologik ma’lumotlar milliy bazasini yaratish, 36 mingdan ortiq hisobot va birlamchi ma’lumotlarni raqamlashtirish rejalashtirilgan.

Shuningdek, 2026–2030 yillarda geologiya sohasi hamda oltita yirik sanoat korxonasida sun’iy intellekt va raqamli texnologiyalarga asoslangan 44 ta loyihani amalga oshirish ko‘zda tutilgan.