Prezident Shavkat Mirziyoyev sun’iy intellekt ekotizimini rivojlantirish bo‘yicha amalga oshirilayotgan ishlar va istiqboldagi ustuvor vazifalarga bag‘ishlangan taqdimot bilan tanishdi.
Qayd etilishicha, so‘nggi yillarda mamlakat sun’iy intellektga tayyorlik bo‘yicha xalqaro reytingda 25 pog‘ona yuqorilab, 62-o‘rinni egallagan. Endi 2030-yilga qadar ushbu reytingda O‘zbekistonni eng ilg‘or 50 davlat qatoriga olib chiqish rejalashtirilgan.
Buning uchun sun’iy intellekt asosidagi dasturiy mahsulot va xizmatlar hajmini 1,5 milliard dollarga yetkazish, hisoblash infratuzilmasini kengaytirish hamda 200 dan ortiq yangi loyihani amalga oshirish ko‘zda tutilgan.
Taqdimotda zamonaviy hisoblash infratuzilmasini rivojlantirish masalalari ham muhokama qilindi. Xususan, o‘tgan oy «Raqamli hukumat» data-markazida NVIDIA texnologiyalari asosidagi superkompyuter ishga tushirilgani, uning quvvati bo‘yicha jahon reytingida 321-o‘rinni egallagani qayd etildi. Mavjud klasterni kengaytirish uchun qo‘shimcha 70 million dollar yo‘naltirish taklif etildi.
Prezident sohada sifatli ma’lumotlar bazasini shakllantirish, vazirlik va idoralardagi ma’lumotlarni tartibga solish, joriy yilning o‘zida iqtisodiyot va ijtimoiy sohalarda sun’iy intellekt asosidagi loyihalar sonini 100 tadan oshirish zarurligini ta’kidladi.
Shuningdek, IT Park rezidentlari, startaplar va sun’iy intellekt laboratoriyalari bilan hamkorlikni kengaytirish, sohada kadrlar tayyorlashni kuchaytirish, «Besh million sun’iy intellekt yetakchilari» loyihasini to‘liq amalga oshirish hamda barcha hududlarda sohaviy xakaton va tanlovlarni tashkil etish bo‘yicha vazifalar belgilandi.
Taqdimot yakunida mutasaddilarga hisoblash quvvatlarini izchil oshirish, amaliy loyihalarni ko‘paytirish, iqtidorli yoshlar va startaplarni qo‘llab-quvvatlash hamda sun’iy intellekt sohasida xalqaro hamkorlikni yanada kengaytirish yuzasidan aniq topshiriqlar berildi.
