Oʻzbekiston Markaziy banki boshqaruvi Tezkor toʻlovlar tizimi orqali jismoniy shaxslar oʻrtasida mobil telefon raqami asosida pul oʻtkazmalarini amalga oshirish qoidalarini tasdiqladi.
Markaziy bank boshqaruvining 2026-yil 14-avgustdagi 22/6-son qarori 24-avgust kuni Adliya vazirligida 3930-son bilan davlat roʻyxatidan oʻtkazilgan. Hujjat rasmiy eʼlon qilingan kundan eʼtiboran uch oy oʻtgach kuchga kiradi.
Yangi qoidalarga muvofiq, jismoniy shaxslar Tezkor toʻlovlar tizimi orqali bir-biriga mobil telefon raqami asosida bank hisobvaraqlaridan toʻgʻridan toʻgʻri pul oʻtkazishi mumkin boʻladi. Buning uchun oluvchining mobil telefon raqami uning bank hisobvaragʻiga bogʻlangan boʻlishi kerak.
Barcha jarayonlar avtomatik ravishda real vaqt rejimida amalga oshiriladi. Bunda banklar axborot va kiberxavfsizlikni taʼminlash, shuningdek, firibgarlik holatlarining oldini olish boʻyicha belgilangan talablarga rioya qilishi shart.
Telefon raqami bank hisobvaragʻiga bogʻlanadi
Yangi tartibda bank mobil ilovasida roʻyxatdan oʻtgan foydalanuvchining telefon raqamini uning bank hisobvaragʻiga bogʻlash nazarda tutilgan.
Bir bank doirasida foydalanuvchi oʻz mobil telefon raqamini faqat bitta bank hisobvaragʻiga bogʻlay oladi. Bogʻlash jarayoni yakunlanganidan keyin maxsus «bogʻlash kodi» shakllantiriladi va u bankning mobil ilovasida koʻrsatiladi. Kod olingan vaqtdan telefon raqami bank hisobvaragʻiga bogʻlangan hisoblanadi.
Agar foydalanuvchi mobil ilovada yangi telefon raqamini roʻyxatdan oʻtkazsa, avval hisobvaraqqa bogʻlangan raqam avtomatik ravishda yangisiga almashtiriladi.
Shuningdek, foydalanuvchi istalgan vaqtda mobil ilova orqali yoki bankka bevosita murojaat qilib, telefon raqamini hisobvaraqqa bogʻlashni bekor qilishi mumkin.
Pul oʻtkazmalari 24/7 ishlaydi
Mobil ilova orqali telefon raqami asosida pul oʻtkazmalari uzluksiz - sutkasiga 24 soat, haftasiga 7 kun amalga oshiriladi. Agar mijoz pul oʻtkazish uchun bankka bevosita murojaat qilsa, operatsiya bankning ish kunlari va ish vaqtida bajariladi.
Pulni joʻnatishdan oldin toʻlovchiga oʻtkazma summasi, pulni oluvchining familiyasi, ismi va otasining ismi, mablagʻ tushadigan bank nomi hamda xizmat uchun undiriladigan vositachilik haqi haqida maʼlumot koʻrsatiladi. Shundan soʻng toʻlovchi operatsiyani yakuniy tasdiqlaydi.
