Visual Capitalist infografikasi Similarweb maʼlumotlari asosida tayyorlangan. Reyting kompyuter va mobil qurilmalar brauzerlari orqali saytlarga tashriflarni hisobga oladi. Ilovalar, API va boshqa mahsulotlarga oʻrnatilgan sunʼiy intellekt funksiyalaridan foydalanish unga kiritilmagan.
Shuningdek, raqamlar alohida foydalanuvchilar sonini emas, tashriflar sonini anglatadi: bir kishi saytga bir necha marta kirishi mumkin.
Sentabr oyida Gemini saytiga 2,6 milliard marta tashrif buyurilgan. Uchinchi oʻrindagi Claude esa qariyb bir milliard tashrif qayd etgan. Bu DeepSeek, Grok, Copilot va Perplexity saytlarining jami koʻrsatkichidan ham koʻp.
ChatGPT va Gemini birgalikda chat-botlar saytlariga tashriflarning asosiy qismini egallagan. Qolgan platformalar hissasiga umumiy trafikning beshdan biridan kamrogʻi toʻgʻri kelgan.
2025-yil oktabridan 2026-yil sentabrigacha boʻlgan davrda Gemini va Claude tahlildagi yirik chat-botlar orasida oʻz ulushini oshirgan yagona platformalar boʻlgan. Manbada Gemini oʻsishi Google’ning keng foydalanuvchilar bazasi, Claude’niki esa dasturlash va axborot bilan ishlash imkoniyatlari hamda ommaviy tanilishining ortishi bilan izohlangan.
Claude 2025-yil oktabrida beshinchi oʻrinda turgan boʻlsa, endi uchinchi pogʻonaga koʻtarilgan. Shu davrda DeepSeek, Grok, Copilot va Perplexity’ning umumiy ulushi 11,4 foizdan 8,1 foizga tushgan.
Microsoft Copilot 1,5 foizlik ulush bilan oltinchi oʻrinni egallagan. Biroq bu koʻrsatkich uning Windows va Microsoft Office tarkibida ishlatilishini qamrab olmaydi. Shu sababli reyting chat-botlarning barcha platformalardagi umumiy ommabopligini emas, aynan veb-saytlariga tashriflarni aks ettiradi.
