Mashhurlarning o‘zgarishlar haqida hikoyalari: Gulistondagi “Konstitutsiya o‘zimizniki” tadbiridan reportaj

Bayram konsert dasturi formatida o‘tkazilgan tadbirdan shu yilning 30 aprel kuni bo‘lib o‘tadigan referendumdagi faollikka chaqiriqlar, taniqli san’at namoyondalirining chiqishlari, siyosat va san’at vakillarining ta’sirli hayotiy hikoyalari ham o‘rin oldi.

Dastur davomida Shavkat Mirziyeyovning prezidentlik lavozimiga kelganidan so‘ng amalga oshgan ayrim islohotlar bolalar va taniqli aktyorlar ijrosidagi sahna ko‘rinishlari orqali namoyish etildi.

Xususan:

• bolalar mehnatiga barham berilishi;
• “oq oltin”ning ta’limdan ustun qo‘yilishi ortidan yillarki dalalarda paxta tergan o‘qituvchilarning bu majburiyatdan ozod etilishi;
• plastik kartochka mablag‘larini naqdlashtirishdagi sarsongarchilikning tugatilishi;
• ommaviy axborot vositalari faoliyatining erkinlashishi haqidagi namoyishlar tadbirning kulminatsion chiqishlari bo‘ldi.

Shuningdek, taniqli aktyor Matyoqub Matchonov ham tadbirdagi chiqishida qamoqda o‘tkazgan kunlarini eslab, u yerda ko‘rganlarini dushmaniga ham ravo ko‘rmasligini aytib o‘tdi.

Oldinroq shunday tadbirlar Farg‘ona va Andijon viloyatlarida ham o‘tkazilgandi.

Konstitutsiyaviy qonun loyihasi bo‘yicha targ‘ibot tadbirlari respublikaning barcha hududlarida o‘tkazilishi rejalashtirilgan.