O‘zbekiston va Rossiya qo‘shma investitsiya loyihalarining yirik to‘plami ustida ish olib borayotgani ma'lum bo‘ldi

Uchrashuvda ikki tomonlama savdo-iqtisodiy, investitsiyaviy, sanoat, madaniy-gumanitar hamkorlikning muhim masalalari yuzasidan fikr almashildi. Ikki tomonlama munosabatlar rivojining yuqori dinamikasi va ikki davlat o‘rtasidagi strategik sheriklik izchil mustahkamlanayotgani ta'kidlandi.

Uchrashuv chog‘ida savdo–iqtisodiy va investitsiyaviy sohalarda hamkorlikni kengaytirish borasida birgalikda olib borilayotgan ishlarning istiqbollari va joriy holati ko‘rib chiqildi. Tomonlar yaqin kelajakda ikki mamlakat o‘rtasidagi savdo aylanmasi hajmini 10 mlrd dollarga yetkazish maqsadida, uni oshirish bo‘yicha birgalikda amaliy chora-tadbirlar ko‘rishga sodiqligini bildirdi. Shu nuqtayi nazardan ikki mamlakat bojxona organlarining ikki davlat hududlari orqali yuk tashishni amalga oshirishda bojxona tartibini soddalashtirishga qaratilgan muvaffaqiyatli hamkorligi qayd etildi.

Investitsiyaviy hamkorlikni rivojlantirishga alohida e'tibor qaratildi, ikki mamlakat hukumatlari tomonidan qo‘shma investitsiya loyihalarining yirik to‘plamini joriy etish ustida ish olib borilayotgani aytildi. Kelishilgan loyihalarni hayotga tatbiq etishni jadallashtirish maqsadida ikki mamlakat tegishli vazirlik va idoralari darajasida yaqin hamkorlikni davom ettirish bo‘yicha kelishuvga erishildi.

Shuningdek, oldindan rejalashtirilgan ikki tomonlama tadbirlar, jumladan, O‘zbekiston va Rossiya hukumatlari rahbarlari darajasidagi qo‘shma komissiya yig‘ilishi hamda Toshkent shahrida “Innoprom. O‘zbekistonda katta sanoat haftaligi” xalqaro sanoat ko‘rgazmasini o‘tkazish bilan bog‘liq masalalar muhokama qilindi.

O‘zbekistonning soliq va kadastr tizimini isloh qilish, shuningdek standartlashtirish sohasida milliy qonunchilikni xalqaro me'yorlar bilan uyg‘unlashtirishga qaratilgan qator loyihalarni amalga oshirish uchun Rossiya texnik yordamini jalb etishga kelishildi.

Uchrashuv yakunida O‘zbekiston – Rossiya ko‘p qirrali munosabatlarini yanada chuqurlashtirish va hamkorlikning ustuvor yo‘nalishlari bo‘yicha ikki tomonlama aloqalarni mustahkamlashga oid qator kelishuvlarga erishildi.