21-22 dekabr kunlari «Ipak yo‘li» turizm xalqaro universitetida X FLTAL-2020 onlayn-anjumani bo‘lib o‘tdi. Unda yigirmata davlatdan yuzga yaqin ishtirokchi qatnashdi.
Ma'lumot o‘rnida aytish mumkinki, FLTAL uyushmasi O‘zbekistonda chet tillar o‘qitish sohasida jahon pedagogik innovatsiyalari va eng so‘nggi ilmiy-metodik tadqiqotlarni taqdim etib kelmoqda.
Anjumanda Qozog‘iston, Rossiya, Xitoy, Singapur, Yaponiya, Tailand, Turkiya, Italiya, Kanada, Saudiya Arabistoni, Vengriya, Qatar, Janubiy Koreya, AQSh, Sloveniya, Yangi Zelandiya, Isroil, Qirg‘iziston, Eron, Falastin kabi mamlakat vakillari ishtirok etishdi.
Tilshunoslik professori Azamat Akbarov tashabbusi bilan asos solingan FLTAL uzoq yillar davomida haqiqiy brendga aylandi, ilmiy doiralarda keng tanildi. Chunki u oz emas, ko‘p emas, filolog olimlar, tilshunoslar, til o‘qituvchilarining o‘ziga xos olimpiya o‘yinlari kabi o‘tadi. Nufuzli jahon ekspertlari taassurotiga ko‘ra, mutaxassislarning anjumanda namoyish etilgan amaliy pedagogik va ilmiy-tadqiqot ishlarida bevosita erishgan yutuqlari metodik ta'lim jarayonini jiddiy chuqurlashtirish va takomillashtirish, samarali natijaga erishishga ketadigan vaqtni sezilarli darajada qisqartirish, zamonaviy tilshunoslik rivojida yangi istiqbollar va rivojlanish yo‘llarini belgilab olish imkonini berdi.
Konferensiya tashkilotchilari – «Ipak yo‘li» turizm xalqaro universiteti, O‘zbekiston Respublikasi Turizmni rivojlantirish davlat qo‘mitasi va Pekin xalqaro aloqalar universiteti bunday loyihani munosib ravishda jahon talablari darajasida amalga oshirishga erishdi.
Konferensiyada faol qatnashgan talabalar orasida «Eng yaxshi maqola» nominatsiyasi bo‘yicha taqdirlash marosimi o‘tkazildi. Ushbu rag‘bat talabalarni ilmiy maqolalar yozishga va bu kabi xalqaro miqyosdagi tadbirlarda akademik ko‘nikmalarni rivojlantirishga yordam berishi shubhasiz.
Anjumanning ochilish marosimida Pekin Xalqaro aloqalar universiteti prorektori Cheng Vey, O‘zbekiston davlat Jahon tillari rektori Ulug‘bek Azizov, Qoraqalpog‘iston Milliy universiteti prorektori Atabek Alimov o‘z nutqlari bilan konferensiya ishtirokchilari oldida chiqish qilishdi.
"Ipak yo‘li" xalqaro turizm universiteti jamoatchilik bilan ishlash bo‘limi
