Аҳолини рўйхатга олиш қанчага тушади?

2022 йил кузида Ўзбекистон аҳолисини рўйхатга олиш ишларига 150 минг киши шартнома асосида жалб этилади.

Дастлабки ҳисоб-китобларга кўра, аҳолини рўйхатга олиш ишларига сарфланадиган маблағ миқдори аҳоли жон бошига ўртача 3 АҚШ долларидан тўғри келиши мумкин. Бу харажатлар давлат бюджетидан қопланади.

Бу ҳақда Давлат статистика қўмитаси раиси ўринбосари Маҳмуджон Зиёдуллаев 18 октябрь куни Олий Мажлис Қонунчилик палатаси ялпи мажлисида маълум қилди, деб хабар бермоқда Kun.uz мухбири.

Ялпи мажлисда депутатлар «Аҳолини рўйхатга олиш тўғрисида»ги қонун лойиҳасини биринчи ўқишда кўриб чиқиб, маъқуллашди.

Депутат Жолдасбай Абдижамиловнинг сўзларига кўра, қонун лойиҳасини ишлаб чиқишда МДҲ, Осиё ва Европа мамлакатларининг қонунчилиги, хусусан, Россия, Беларусь, Буюк Британия ва Литва каби давлатлар тажрибаси ўрганилган.

Қонун лойиҳаси апрель ойида эълон қилинганди. Айни жараёнда уйларнинг ҳам рўйхати тузилади.