Қашқадарё вилояти ҳокими ўзгариши кутилмоқда

Қашқадарё вилояти раҳбариятида ўзгариш юз бериши кутилмоқда.

Қашқадарё вилояти ҳокими Зойир Мирзаев лавозимидан озод этилиши кутилмоқда. Kun.uz’нинг ҳукуматдаги манбаси хабар беришича, унинг ўрнига Божхона қўмитаси раиси Муроджон Азимов вилоятнинг янги ҳокими этиб тайинланади. 

Манбанинг таъкидлашича, Тошкент вилоятида ҳам тайинловлар кутилмоқда, бу ҳақда ҳозирча тасдиқланган маълумот йўқ.

Муроджон Азимов 1976 йил Қашқадарё вилоятида туғилган. 1998 йилда Тошкент юридик институтини тугатган. Қарши шаҳар прокуратурасида терговчи, Қашқадарё вилоят прокуратурасига прокурор, кейинроқ вилоят прокурорининг ўринбосари ва туман прокурори лавозимларида ишлаган.

2014 йилда у Бухоро вилояти прокурори этиб тайинланиб, у ерда 2016 йилгача ишлаган. 2016 йил сентябрь ойидан бошлаб у Ўзбекистон Республикаси Бош прокурори ўринбосари лавозимида ишлаган. 

Генерал-майор Муроджон Азимов 2018 йил феврал ойида Божхона қўмитасига раис этиб тайинланганди. У қўмита раҳбарлигида Муиджон Тоҳирийнинг ўрнида иш бошлаганди.

Зойир Мирзаев 1968 йил 10 март куни Самарқанд вилояти Жомбой туманида туғилган. 1994 йил Тошкент молия институтини тамомлаган.

2003-2004 йилларда Жомбой тумани ҳокими, 2004-2008 йилларда Самарқанд вилояти ҳокими ўринбосари, 2008-2010 йилларда Самарқанд шаҳри ҳокими бўлган, 2010 йилдан 2016 йилгача Самарқанд вилоятини бошқарган.

2016 йилдан 2018 йилгача бош вазир ўринбосари - Қишлоқ ва сув хўжалиги вазири, агросаноат мажмуаси раҳбари, 2018 йилдан - бош вазир ўринбосари - агросаноат, озиқ-овқат ва халқ истеъмол моллари мажмуаси раҳбари бўлиб ишлаган. 2018 йил 7 ноябрь куни Жиззах вилояти, Шароф Рашидов тумани ҳокими лавозимига тайинланган.

У 2019 йил октябрида Қашқадарё вилояти ҳокими сифатида иш бошлаганди. Унинг кейинги фаолияти ҳақида ҳозирча маълумот йўқ.

• Маълумот учун, бу Ўзбекистонда ой бошидан буён иккинчи вилоятда раҳбар ўзгаришидир. Аввалроқ 2016 йилдан буён Навоий вилоятига раҳбарлик қилиб келган Қобул Турсунов ишдан олиниб, Тошкент шаҳар давлат солиқ бошқармаси бошлиғи лавозимида ишлаб келган Нормат Турсунов вилоятнинг янги ҳокими бўлганди.