Германия Тошкент вилоятида маиший чиқиндиларни қайта ишлаши мумкин

Сафар давомида қатор молия институтлари ва йирик компаниялар раҳбарлари билан учрашувлар ўтказилди. Хусусан, кооператив банклар гуруҳига хизмат кўрсатувчи ва Германияда активлар ҳажми бўйича иккинчи йирик молия ташкилоти – DZ BANK раҳбарлари билан учрашувда томонлар саноат лойиҳалари учун корпоратив ва инвестициявий молиялаштириш, савдо молияси ҳамда B2B шаклида ҳамкорликни кенгайтириш масалаларини муҳокама қилди.

ODDO BHF Франция-Германия мустақил банк гуруҳи раҳбарлари билан мулоқотда хусусий сармоя ва активлар бошқаруви орқали ҳудудий лойиҳаларга инвестиция жалб этиш, экспортга йўналтирилган корхоналарни молиялаштириш имкониятлари кўриб чиқилди.

Бундан ташқари, AKA Bank экспорт-кредитлашга ихтисослашган банк консорциуми мутасаддилари билан кечган суҳбатда экспорт кредит агентликлари (ECA) кафолатлари асосида узоқ муддатли молиялаштириш механизмларини қўллаш бўйича келишувга эришилди.

Франкфуртда жойлашган йирик Helaba тижорат банкида бўлиб ўтган музокарада томонлар инфратузилма ва ишлаб чиқариш лойиҳаларини синдикат кредитлари ва капитал бозори инструментлари орқали қўллаб-қувватлаш истиқболларини муҳокама қилди.

Шунингдек, Тошкент вилояти делегация AMK Global GmbH, Falk-Porsche-Technik GmbH, Kessler Zoologiegroßhandel GmbH & Co. KG, Weingut Koegler ва Azerbaijan-Uzbekistan Investment Company (AUIC) компаниялари вакиллари билан учрашди. Уларда чиқиндиларни қайта ишлаш, саноат материаллари ва ускуналар, озиқ-овқат тармоғи, виночилик ҳамда қўшма инвестиция платформаларидан фойдаланиш масалалари кўриб чиқилди. AMK Global'нинг Тошкент вилоятида маиший чиқиндиларни қайта ишлаш лойиҳаси бўйича ишлашга тайёрлиги қайд этилди.