Адлия вазири: Амалдорларнинг кўчмас мулклари ва машиналари тўғрисидаги ахборотлар очиқланиши керак

Русланбек Давлетов соҳаларда очиқликни таъминлаш стандартларини яратиш кераклиги ҳақида гапирди.

Ўзбекистон бюджет пулларини сарфланиши очиқлигининг янги босқичига ўтиши, амалдорларнинг харажатлари очиқланиши керак, дейди Адлия вазири Русланбек Давлетов 22 апрель куни бошланган «Tashkent Law Spring» II халқаро юридик форумидаги чиқишида.

Вазир мамлакат учун рақамлаштириш ва очиқлик бўйича устувор соҳаларни белгилаб олиши кераклигини таъкидлади.

«Чунки йўналиш кўп, муаммо етарли, ресурслар танқислигини эътиборга олиб энг биринчи навбатда қилиниши керак бўлган ва давлат томонидан молиялаштирилиши ва қўллаб-қувватланиши керак бўлган йўналишлар белгиланиши керак.

Масалан, биринчи навбатда бюджет пуллари сарфланиши очиқлигининг янги босқичи, айниқса долзарб бўлган автомобиль йўлларга кетаётган харажатлар, аниқ манзиллари билан интерактив карталарда кўриниши керак. Ҳар бир ташкилотнинг ўз маъмурий биноларини таъмирлашга кетказаётган харажатлари, шунингдек, амалдорларнинг кўчмас мулклари ва машиналари тўғрисидаги ахборотлар очиқланиши керак», – дея Русланбек Давлетовнинг сўзларини келтирмоқда Kun.uz мухбири.

Эслатиб ўтамиз, Коррупцияга қарши курашиш агентлиги ишлаб чиққан қонун лойиҳасида, президентдан бошлаб барча бўғинлардаги давлат амалдорлари мол-мулки ва даромадларини декларация қилиши белгиланган.

Янги тартиб қачон қабул қилиниши аниқ эмас. Шуниси маълумки, декларациялаш талаби бу йил кучга кириши кутилмаяпти: 2021 йилги давлат дастури лойиҳасида бу ҳақда банд йўқ.

Жаҳонгир Ортиқхўжаев мол-мулки ва даромадлари бўйича декларация топшириб боришга тайёрлигини маълум қилди

«Мен бунга тўлақонли тайёрман» – Зойир Мирзаев мол-мулки ва даромадларини декларация қилиш ҳақида

Тайёрлаган: Фаррух Абсаттаров

#декларация #Русланбек Давлетов