Даврий божхона тўловлари учун график расмийлаштириш қоидалари эълон қилинди

Адлия вазирлигида “Даврий божхона тўловларини тўлаш графигини тўлдириш тартиби тўғрисида”ги йўриқнома давлат рўйхатидан ўтказилди. Рўйхат рақами — 3724, рўйхатдан ўтказилган сана — 2025 йил 12 декабр.

Йўриқномага кўра, график декларацияловчи шахс томонидан қуйидаги ҳолларда божхона органига тақдим этилади:

товар(лар)ни вақтинча олиб кириш божхона режимига жойлаштиришда даврий божхона тўловларини ҳар ойда ёки йилнинг ҳар чорагида тўлаш маълум қилинган тақдирда;
божхона тўловларидан шартли озод этиш бўйича берилган имтиёзларнинг амал қилиш муддати тугаши муносабати билан вақтинча олиб киришнинг кейинги муддатида даврий божхона тўловларини тўлаш лозим бўлганда.

Шунингдек, божхона юк декларацияси (БЮД) қоғоз шаклда божхона органига тақдим этилган тақдирда, график ҳам қоғоз кўринишида А4 форматдаги 4 нусхада расмийлаштирилиши белгиланган. Нусхалар қуйидагича тақсимланади:

• 1-нусха — божхона пости учун;
• 2-нусха — декларацияловчи шахс учун;
• 3- ва 4-нусхалар — декларант учун.

Қайд этилишича, графикнинг ҳар бир нусхаси декларацияловчи шахс ҳамда божхона органининг мансабдор шахси томонидан тасдиқланади.