Чехияда 100 йиллик иссиқ ҳарорат рекорди янгиланди

Чехияда синоптиклар сентябрь ойи ўртаси учун рекорд даражадаги иссиқ ҳароратни қайд этишди. Прагада термометрлар +33,2 даража (Цельсий) иссиқ ҳароратни қайд этишган.

"Чехияда бешинчи кунки, иссиқ ҳарорат рекорди янгиланмоқда. Прагада куннинг иккинчи ярмида термометр +33,2 даража иссиқни кўрсатди. Республиканинг аксар қисмида +32 даража иссиқ қайд этилган. Бу эса 100 йиллик рекорднинг янгиланиши ҳисобланади", дейилган хабарда.

Метеоролог Ян Шрамекнинг айтишича, Марказий Европада ҳаво босими ошиб, одатдагидан 10 даража юқори, Ўрта Ер денгизи бўйларига хос ҳарорат қайд этилиши кузатилмоқда. 

Синоптикларнинг прогнозларига кўра, вазият ҳафта ўртасигача сақланиб қолади. Ҳафтанинг иккинчи ярмида Чехияга ғарбдан ёмғир келади ва ўртача ҳарорат 22-25 даражага тушади.