Россия элчиси изоҳ бериш учун Бельгия ТИВга чақиртирилди

Фото: AFP

Бельгия Ташқи ишлар вазирлиги Россиянинг Брюсселдаги элчисини руслар бельгияликларни Ҳалабда тинч аҳоли вакилларини бомбардимон қилишда айблагани бўйича чақиртирди.

«Россиянинг Бельгиядаги элчиси Александр Токовинин Ташқи ишлар вазирлигига Россия томони Ҳалабдаги авиазарбалар бўйича берган баёнотига тушунтириш сўраб чақиртирилди», — дея Бельгия ТИВ раҳбари Дидье Рейндерснинг сўзларини келтирган La Libre нашри.

Бундан олдинроқ, Бельгия Мудофаа вазири Стивен Вандепут мамлакат Ҳарбий ҳаво кучлари самолётлари Ҳалабда тинч аҳоли вакилларини бомбардимон қилгани айтилган баёнотни инкор қилиб чиққанди.

18 октябрь куни кечқурун Россия Мудофаа вазирлиги Суриядаги зиддиятли томонларни яраштириш бўйича Россия маркази баённомасига асосланиб Хаасажек қишлоғида Бельгиянинг F-16 самолётлари берган зарба оқибатида олти киши ҳалок бўлиб, тўрт киши жароҳатлангани ҳақида хабар тарқатганди.

Тайёрлаган: Азиз Қаршиев

#Ҳалаб #Россия элчиси #Бельгия ТИВ

Сурияда 2011 йилда бошланган фуқаролар уруши мамлакатни бир неча қисмларга бўлиб ташлаган. Сурия ҳукумати, ИШИД, курдлар ва бошқа турли жангари гуруҳлар ўртасидаги қуролли тўқнашувлар ҳамон давом этмоқда.