Черногория НАТО аъзоси бўлишига бир қадам қолди

Черногория ташқи ишлар вазири Срджан Дарманович унинг мамлакати шу йил май ойида Брюсселда НАТОнинг саммитида бу ташкилотга киришига умид қилишини айтди. Сиёсатчи бу ҳақда Reuters ахборот агентлигига берган интервьюсида айтиб ўтди. 

Дармановичнинг айтишича, Подгорица Вашингтонда АҚШ сенати Черногориянинг НАТОга қўшилишига рухсат беришига расмий ишонч олган. "Бу 100 фоизга юз беради", деб айтган вазир. Бу жараёнга амалдаги АҚШ маъмуриятининг Москва билан муносабатларни йўлга қўйишга интилиши ҳам халақит қилмайди. 

НАТОнинг 2009 йил декабрдаги саммитида Черногория НАТОга аъзо бўлиш учун ҳаракатлар режасини олган. 2016 йилда мамлакат НАТОга кириши бўйича протокол имзоланган ва шундан кейин мамлакат НАТОда кузатувчи мақомини олган. Бу протокол НАТОнинг барча давлатлари ва Черногория томондан ратификация қилингандан кейин Черногория НАТОнинг 29-аъзосига айланади. Протоколни НАТОга кирувчи 28 та давлатдан 24 таси ратификация қилиб бўлди, бироқ АҚШ сенати ҳозирча буни қилмаган. 

НАТОнинг навбатдаги саммити Брюсселда 25 май куни ўтади.