Буюк Британия бош вазири Тереза Мэй Яқин Шарққа дипломатик ташриф билан бориш учун хусусий самолётни ижарага олишга мажбур бўлди. Бу шаҳзода Чарльз Британия ҳукумати расмий лайнерини биринчи бўлиб банд этиб қўйгани туфайли юз берган, деб ёзмоқда Independent газетаси.
Маълум бўлишича, Чарльз Мэйдан аввал RAF Voyager A330’ни банд қилиб қўйган ҳамда ундан фойдаланиш ҳуқуқига эга бўлган. Нашр маълумотига кўра, британиялик солиқ тўловчилар қайта жиҳозлаш учун 10 миллион фунт стерлинг тўлаган самолёт расмий ташрифлар учун хусусий самолётларни ижарага олишда иқтисод қилиб қолиш имконини бериши керак эди.
Нашрнинг ёзишича, шаҳзода Чарльз ва Корнуол герцогиняси Камилла Европанинг уч давлатига тўққиз кунлик ташрифни амалга оширишди.
