Дунёдаги энг кекса Олимпия чемпиони ҳаётдан кўз юмди

Олимпия медалининг энг кекса соҳиби ва афсонавий америкалик сузувчи Адольф Кифер 98 ёшида ҳаёт билан видолашди, деб хабар қилмоқда Рейтер агентлиги.

"Адольф Кифер сузиш спорти тимсоли эди ва ҳаётида ҳар куни у билан яшади. У мазкур спорт турининг кашшофи эди", — дея АҚШ сузиш федерацияси ижрочи директори Майк Анжер сўзларини келтиради агентлик. 

Адольф Кифер 1936 йили Берлинда бўлиб ўтган Олимпия ўйинларида 17 ёшида олтин медални қўлга киритган эди. У 100 метрга сузиш бўйича жаҳон рекордини ўрнатган бўлиб, ушбу натижани 20 йил мобайнида ҳеч ким такрорлай олмади. Кейинчалик у Спорт ва овқатланиш бўйича маслаҳатчи бўлиб ишлади. Бундан ташқари, Америка ҳарбий-денгиз кучларида инструктор ҳам бўлган.