Эрдўған Қатар суверенитетини ҳурмат қилишга чақирди

Туркия президенти Ражаб Тойииб Эрдўған Ҳамбургда ўтган G20 саммити якунида нутқ сўзлар экан Қатар муаммосига тўхталиб ўтди. У мазкур мамлакатнинг суверенитетлигини ҳурмат қилишга чақирди. NTV телеканали бу жараённи эфирга узатиб турди.

“Қатарнинг суверенитетлигини ҳурмат қилиш бошқа мамлакатларнинг суверенитетлигини ҳурмат қилишдек муҳимдир. Биродарликка қарши ғалаба қозониш мумкин эмас”, — деди Эрдўған.     

Унинг сўзларига кўра, Қатарни айблаш ва араб давлатлари томонидан унга қарши санкциялар киритиш ҳеч қандай асосга эга эмас. Туркия етакчисининг таъкидлашича, Форс кўрфази мамлакатларидаги хавфсизлик ва барқарорлиги Туркия томони учун унинг хавфсизлиги сингари ўта муҳимдир.  

“Бу ҳудуддаги барча мамлакатлар, жумладан, Саудия Арабистони ҳам инқирозни ҳал этиш учун зарур чоралар кўрмоқликлари шартдир. Провокацияларга қарши бўлишга чақирамиз”, — деб қўшимча қилди Эрдўған.