Испания бош вазири Пучдемоннинг учрашиш таклифини рад этди

Испания бош вазири Мариано Рахой Каталониянинг собиқ раҳбари Карлес Пучдемоннинг Испаниядан бошқа ерда учрашиш таклифини рад этди. Бу ҳақда El Pais нашри маълум қилди. 

“Мен сайловларда ким ғалаба қилган бўлса, ўша билан учрашаман, бу эса Арримадас хонимдир (“Фуқаролар” партиясининг Каталониядаги бўлими раҳбари Инес Арримадас – таҳр.)”, деб айтган Рахой Каталониядаги сайловлар натижалари бўйича ўтказилган матбуот анжуманида.

Рахойдан бу ҳақда яна бир бор сўралганда у “Каталония женералитетига бошчилик қиладиган киши билан учрашишини, бунинг учун у одам сайланиши, лавозимига киришиши ва Рахой билан музокаралар ўтказиш ваколатига эга бўлиши лозимлигини” айтган.

Аввалроқ Пучдемон Рахой билан Брюсселда ёки Испаниядан бошқа исталган жойда учрашишга тайёрлигини маълум қилган. 

Каталонияда 21 декабрда парламент сайловлари бўлиб ўтди, унда Каталония мустақиллигини қўллаб-қувватловчи учта партия 135 ўринлик парламентдан 70 ўрин эгаллаган, яъни мутлақ кўпчиликни ташкил қилган. Каталония мустақиллигига қарши чиқаётган “Фуқаролар” партияси 37 ўрин, Рахойнинг “Миллий партия”си 3 ўрин олган.