Ўзбекистондан Қирғизистонга қопларда мис улоқтирилгани аниқланди 

Қирғизистон чегарачилари ноқонуний мис партиясини ушлашди. Мис Ўзбекистондан Қирғизистонга қопларга солиниб, чегара чизиғи устидан улоқтирилган. Бу ҳақда Қирғизистон давлат чегара хизматида маълум қилинди.  

Маълум қилинишича, Ўзбекистон ҳудудидаги номаълум шахслар давлат чегара чизиғи орқали Қирғизистонга мис солинган 28 та қопни улоқтиришган. Бу вақтда Қирғизистон ҳудудида юкни 5 киши пойлаб турган.    

Контрабандачиларнинг бу операцияси ортидан Айдаркен чегара отряди кузатув олиб борган. Қирғизистонликлар металлни олишлари билан чегара наряди томонидан қўлга олинганлар. 

Маълум қилинишича, воқеа Кадамжай туманидаги Ақ-Жар қишлоғида юз берган. Ҳаммаси бўлиб 400 кг мис қўлга киритилган. Ушланганлар чегара тартибини бузганлари учун жаримага солинганлар, юк эса Қирғизистон божхона хизматининг ҳудудий бўлими ходимларига топширилган.