Роскомнадзор Telegram ишига кўмак кўрсатаётган барча ресурсларни блокламоқчи

Фото: Антон Ваганов/ТАСС

Роскомнадзор Telegram’ни блоклаш учун барча чораларни кўриш ниятида, бунда ҳаттоки унинг ишига ёрдам кўрсатувчи интернет-ресурслар ҳам блокланиши мумкин. Бу ҳақда РИА «Новости» хабар қилмоқда.

«Таганский тумани суди қарори билан Роскомнадзорга Telegram Messenger Limited Liability Partnership томонидан ишлаши таъминланувчи интернет-ресурсларга кириш чекланиши бўйича мажбурият юкланди. Шу сабабдан, Роскомнадзор суд қарорини бажариш учун лозим бўлган барча керакли чораларни кўрмоқда ва кўришда давом этади, жумладан Telegram компанияси сервисларининг ишлашига кўмак кўрсатаётган интернет-ресурсларга кириш бўйича чекловлар жорий этилиши ҳам назарда тутилади», - дея хабар беришган Роскомнадзор матбуот хизматидан.

Шу билан бирга, идорадан эътибор қаратишларича, суд қарори билан Telegram’га кириш учун техник шароитлар яратишни тўхтатиш мажбурияти нафақат Роскомнадзорга, балки «бошқа шахсларга», яъни, жумладан VPN ҳамда прокси-сервисларга эгалик қилувчи компанияларга ҳам юкланган.

Эслатиб ўтамиз, аввалроқ Роскомнадзор Telegram туфайли 1 миллиондан ортиқ IP-манзилни блоклагани хабар берилганди.