Буюк Британия Эрон билан ядровий келишувдан чиқмоқчи эмас

Буюк Британия АҚШ президенти Дональд Трамп Вашингтон Эрон билан ядровий келишувдан чиқишини эълон қилгандан кейин бу келишувдан чиқмоқчи эмас. Бу ҳақда Британия парламентида мамлакат ташқи ишлар вазири Борис Жонсон маълум қилди.

“Буюк Британия келишувдан чиқмоқчи эмас. Аксинча, биз Эрон ўз ядровий дастурини чеклашни давом эттираётганига ишонтириш учун бошқа томонлар билан ҳамкорлик қиламиз. АҚШ қарори Британиянинг келишувда кўзда тутилган чекловлар миллий хавфсизлигимиз ва Яқин Шарқдаги барқарорлик учун муҳим бўлиб қолиши ҳақидаги фикрини ўзгартирмайди”, деб айтган Жонсон.

Жонсон АҚШни “коллектив хавфсизлик манфаати йўлида ҳаракат қилиш ва бошқа томонларга келишувни амалга оширишда халақит берадиган бирор қадамларга йўл қўймасликка” чақирган. “Мен Эронни АҚШ қарорига босиқлик билан жавоб бериш ва келишув доирасида ўз мажбуриятларига риоя қилишда давом этишга чақираман”, деб қўшимча қилган Жонсон.

Трамп 8 май куни АҚШнинг Эрон билан ядровий келишувдан чиқишини эълон қилди.

Буюк Британия, Германия ва Франция етакчилари Тереза Мэй, Ангела Меркель ва Эмманюэль Макрон Трампнинг қароридан кейин келишувнинг барча иштирокчиларини ўз мажбуриятларини тўлақонли бажаришни давом эттиришга чақиришган. Эрон президенти Ҳасан Руҳоний Эрон келишувдан воз кечмаслигини ва ўз мажбуриятларига риоя этишини айтган.