АҚШда ядро бомбаси муваффақиятли синовдан ўтказилгани маълум қилинди

Фото : Staff Sgt. Brandi Hansen

АҚШ ҳарбий-ҳаво кучлари бошқарилувчи B61-12 ядро бомбасининг илк синовларини ўтказди. Бу ҳақда Military.com портали маълум қилди.

Синов вақтида B-2 Spirit бомбардимончи самолётлари қўлланган.

“Бу синовлар B61-12 конструкцияси тизим талабларига жавоб беришини кўрсатади”, деб айтган АҚШ энергетика вазирлигининг ядровий хавфсизликни бошқариш миллий маъмурияти ходими Майкл Люттон.

Синовлар 9 июнда Невада штатидаги ҳарбий полигонда Эдвардс авиабазасининг 419-синов эскадрильяси бошқарувида ўтган.

АҚШ ушбу бомбани Европа давлатлари – Германия, Италия, Туркия, Бельгия ва Нидерландиядаги ҳарбий базаларида жойлаштирмоқчи.

B61-12’нинг илк партияси қуролланишга 2020 йилда олиниши режалаштирилган.