Гулнора Каримованинг адвокати ютқазди

Гулнора Каримова томонидан 800 миллион Швейцария франкининг (810 миллион доллар) 700 миллион долларга яқин қисми мусодара этилиши юзасидан киритилган ариза жиноий ишлар бўйича Швейцария федерал суди томонидан рад этилди.

ОАВ маълумотига кўра, ҳукм 31 июль куни чиқарилган. 

Каримованинг апелляцияси унинг Женевадаги адвокати Грегуар Манжа томонидан киритилган эди. 

«Швейцариядаги ҳисобларга жойлаштирилган ва банд солинган 800 миллион франкнинг 701 миллион долларлик қисми мусодара этилишига қарши даъво ютқазилган», дейилган хабарда.

Бундан олдинроқ, Швейцария Гулнора Каримованинг миллионларини Ўзбекистонга қайтариши мумкинлиги ҳақида хабар берилганди.

Аноним манбанинг таъкидлашича, мазкур пулларга бир неча даъвогарлар бўлган. Уларнинг энг биринчиси Ўзбекистон ҳукумати бўлса, иккинчиси — АҚШ ва учинчиси Zeromax кредиторларидир.

«Гулнора Каримова ва унинг гумашталари молиявий найрангларини АҚШ долларида олиб боргани, боз устига АҚШ банк тизимидан фойдаланганини даъво қилаётган Америка молия вазирлиги пулларнинг бир қисмига эга чиқиши мумкин. Zeromax​ кредиторлари ҳозирча терговга бу компаниянинг асл эгаси Гулнора Каримова бўлганини исботлаб бериша олгани йўқ, шу сабабли уларда амалда бу пулларнинг қандайдир бир қисмини бўлсада қўлга киритиш учун имконият қолмаган», — деганди швейцариялик мулозим.

Ўзбекистон Республикаси Бош прокуратураси Матбуот хизмати Kun.uz'га тасдиқлашича, федерал суд томонидан 22 май куни қабул қилинган қарорга кўра, Гулнора Каримова ҳисобидаги маблағлар (686,7 миллион доллар) Ўзбекистонга қайтарилиши кутилмоқда. Бу борада Бош прокуратура Швейцария томони билан ҳамкорликда иш олиб бормоқда.

Эслатиб ўтамиз, Тошкентдаги Форумлар саройи ва «Бунёдкор» стадионини (ҳозирги «Миллий» стадиони) қуриш учун Zeromax GmbH компанияси 20дан ортиқ Швейцария компаниялари билан шартномалар тузган. 2010 йил 28 октябрда Zeromax касодга учраганини маълум қилган. Европалик кредиторлар эса Каримованинг музлатилган активлари ҳисобидан қарзларнинг қайтарилишини сўраб арз қилган. Қарзнинг умумий миқдори 5 миллиард долларни ташкил қилган. Кредиторлар Zeromax’нинг ҳақиқий эгаси Гулнора Каримова эканини айтган. Компаниянинг собиқ ижрочи директори Миродил Жалолов айни пайтда Ўзбекистондаги қамоқхоналардан бирида жазо муддатини ўтамоқда.

2017 йилнинг ёзида Ўзбекистон Республикаси Бош прокуратурасининг Уюшган жиноятчилик ва коррупцияга қарши курашиш бошқармаси Гулнора Каримовага нисбатан иккита жиноят иши қўзғатилгани ҳақида маълум қилганди.

Унга кўра, Каримова 2015 йилнинг августида жиноят ишлари бўйича Тошкент вилояти суди томонидан бир қатор жиноятларда айбдор деб топилиб, 5 йилга озодликдан маҳрум қилинган. Яна бир жиноят иши бўйича тергов давом этмоқда. У ўзига қўйилаётган барча айбловларни рад қилган.