Шимолий Корея етакчиси Ким Чен Ин КХДРга қарши халқаро санкцияларни изоҳлади. Бу ҳақда КХДР Марказий Телеграф агентлигига асосланиб, RT хабар берди.
Мавжуд маълумотларга кўра, Ким Чен Ин Вонсан-Кальма туристик соҳилбўйи зонасига қилган сафари чоғида Шимолий Кореяга нисбатан қўлланилаётган чораларни «босқинчиларга хос» деб атаган.
«Вонсандаги соҳилбўйи туристик туманини қуриш бўйича катта кампания бизнинг халқимизни босқинчиларга хос санкциялар ва блокада билан бўғишга уринаётган душман кучларига қарши курашимизни намойиш қилади», - деди Ким Чен Ин.
Шунингдек, Шимолий Корея етакчисининг маълум қилишича, сайёҳлик зонасини барпо этилгач, «бутун дунё партия, армия ва халқнинг бирдамлигини кўради».
15 августда АҚШ Молия вазирлиги ўз сайтида Шимолий Кореяга нисбатан қўлланиладиган янги санкциялар рўйхатини эълон қилди.
Эслатиб ўтамиз, аввалроқ КХДР собиқ мудофаа вазири вафот этгани хабар берилганди.
