Абдулазиз Комилов Туркманистоннинг янги элчисини қабул қилди

20 август куни Ўзбекистон Республикаси Ташқи ишлар вазири Абдулазиз Комилов Туркманистоннинг фавқулодда ва мухтор Элчиси этиб тайинланган Язгули Маммедовни қабул қилди. Ташқи ишлар вазирлиги матбуот хизмати шу ҳақида хабар берди.

Туркманистоннинг фавқулодда ва мухтор Элчиси - Язгули Маммедов
Фото: Ташқи ишлар вазирлиги матбуот хизмати

Суҳбат чоғида сиёсий, савдо-иқтисодий, инвестицион, маданий-гуманитар ва бошқа соҳалардаги икки томонлама ҳамкорликнинг ҳозирги ҳолати ва уни янада ривожлантиришнинг истиқболлари тўғрисида фикр алмашилди.

Олий даражадаги мунтазам Ўзбекистон – Туркманистон учрашувлари чоғида эришилган келишувларни амалга ошириш масалаларига алоҳида эътибор қаратилди.

Манбада таъкидланишича, учрашувда Ўзбекистон ва Туркманистон ўртасидаги ўзаро савдо айланмасини ошириш ва унинг номенклатурасини кенгайтириш масаласига муҳим аҳамият берилган. Шу нуқтаи назардан икки томонлама ҳамкорлик институтларининг навбатдаги мажлисларини ўтказишнинг жадвали ва кун тартиби муҳокама қилинди.

Тайёрлаган: Лола Раҳманбаева

#элчи #Туркманистон #Абдулазиз Комилов