Ўзбекистонда Facebook ва YouTube VPN’сиз ишлай бошлади

Бугун, 15 январь кунининг биринчи ярмида Ўзбекистонда интернет узилишлар билан ишлади, унинг тезлиги сезиларли даражада тушиб кетди.

Маҳаллий интеренет-провайдерлари, жумладан Turon Telecom, TPS ва EVO томонидан бу муаммолар «Ўзбектелеком» олиб бораётган техник ишлар билан боғлиқлигини маълум қилди. 

Шу билан биргаликда, куннинг иккинчи ярмида интернет билан боғлиқ муаммолар барҳам топиб, Ўзбекистонда интернет фойдаланувчилари Facebook ижтимоий тармоғи ва YouTube сайтига муаммосиз, ҳеч қандай воситаларсиз, тўғридан-тўғри киришни бошлашди.

Шунингдек, энди BBC Uzbek, «Озодлик», «Фергана.ру» ва «Америка Овози» каби сайтларга киришда ҳам аввалгидек VPN’га ҳожат бўлмаяпти. 

Эслатиб ўтамиз, Ўзбекистонда 2018 йилнинг сентябрь ойи бошида Facebook’дан фойдаланишда муаммолар юзага келганди, октябрь ойидан эса YouTube порталига ҳам ёрдамчи воситаларсиз кириб бўлмай қолганди.

Шундан кейин ўзбекистонликлар орасида хусусий виртуал тармоқ – VPN’дан фойдаланиш оммалашган, фойдаланувчилар шу восита орқали блокланган сайтларга кира бошлашганди.

Маълумот учун, Ўзбекистондаги барча интернет провайдерлари ва операторлари интернетга «Ўзбектелеком» компанияси орқали интернетга уланади. Юқоридаги сайтларга кириш тўсилганида «Ўзбектелеком» ҳам, Ахборот технологиялари ва коммуникацияларини ривожлантириш вазирлиги ҳам бу муаммоларга алоқадор эмаслигини билдирганди.