Boeing миллиардлаб долларлик шартномадан маҳрум бўлди

Boeing компанияси Африкада қулаган лайнер туфайли Индонезиянинг Garuda Indonesia миллий авиакомпанияси билан шартномадан маҳрум бўлди. Бу ҳақда Agence France-Presse хабар қилмоқда.

Гап 49та Boeing 737 Max моделидаги самолётларни етказиб бериш ҳақида кетмоқда. Харид қиймати бир неча ўнлаб миллиард долларни ташкил этиши керак эди. Ушбу келишув йўловчиларнинг хавотирга тушиши туфайли бекор қилинди.

«Биз Boeing'га буюртмани бекор қилиш ҳақида хат юбордик. Garuda йўловчилари ишончни йўқотди ва Boeing 737 MAX’да парвоз қилишни исташмаяпти», - дея хабар берди авиакомпания вакили.

Ташувчи Африкада лайнер қулаганидан сўнг, Boeing билан шартномани илк бора тўлиқ тўхтатди.

Сўнгги ярим йил ичида дунёда Boeing 737 MAX иштирокида иккита авиаҳалокат қайд этилди, улар оқибатида 346 киши ҳалок бўлди. Сўнгги фожиа 10 март куни Эфиопияда юз берди. Самолёт Аддис-Абеба аэропортидан парвозга кўтарилганидан олти дақиқа ўтиб қулади. Бортда бўлган барча 157 киши ҳаётдан кўз юмди. Авиаҳалокат қурбонлари орасида 33та мамлакат фуқаролари бор.

Шундан сўнг, бутун дунё бўйлаб тахминан 30та авиакомпания Boeing 737 MAX самолётларидан фойдаланишни тўхтатди. Евроиттифоқ ва АҚШ уларнинг парвози учун ўз ҳаво ҳудудини ёпиб қўйди.

Boeing 737 MAX - Boeing 737 самолётларининг тўртинчи, энг янги авлоди. Ушбу сериядаги самолётлардан фойдаланиш 2017 йилда бошланган. 737 MAX 8 варианти Boeing тарихидаги энг кўп сотилувчи лайнер саналади.

Бундан олдин, Хитой Boeing 737’ни АҚШ билан савдо битимидан чиқариб ташламоқчи экани хабар қилинганди.