Рафаэль Надаль йил теннисчиси деб топилди

Профессионал теннисчилар ассоциацияси (ATP) ATP Awards 2019 мукофоти ғолибларини эълон қилди. Унга кўра, испан теннисчиси, мавсумни биринчи рақамли теннисчи мақомида якунлаган Рафаэль Надаль “йил ўйинчиси” деб топилди. 33 ёшли Надаль мавсум охирида ATP етакчиси бўлган тарихдаги энг ёши катта теннисчи бўлди.
 
Надаль 2019 йилда “Катта дубулға”га кирувчи 3 та мусобақа финалида ўйнаган ва улардан “Ролан Гаррос” ҳамда АҚШ очиқ чемпионатида ғалаба қозонган. Теннисчи Австралия очиқ чемпионати финалида сербиялик Новак Жоковичга мағлуб бўлган.

Эътиборлиси, мухлислар талқинига кўра “йил ўйинчиси” сифатида швейцариялик Рожер Федерер эътироф этилган.

Шунингдек, бошқа йўналишлар бўйича ғолиблар ҳам эълон қилинган:  

Энг яхши жуфтлик: Хуан Себастьян Кабаль ва Роберт Фара.
Йил қайтиши: Энди Маррей.
Йилнинг энг тараққий этган ўйинчиси: Маттео Берреттини.
Йилнинг энг яхши янги ўйинчиси: Янник Синнер.
Спортча хатти-ҳаракат ва ҳалол ўйин учун Стефан Эдберг мукофоти: Рафаэль Надаль.
Йил мураббийи: Жиль Сервара (Даниил Медведев мураббийи).
Йил турнирлари: Доҳа (ATP 250), Акапулько (ATP 500), Индиан-Уэллс (ATP 1000).

ATP’нинг кейинги мавсуми 6 январда Австралиянинг Брисбенида ATP кубоги ва Доҳада ATP 250 Qatar Open сериясига кирувчи мусобақа билан бошланади.